Presidenti amerikan, Donald Trump, pas bisedimeve që ka zhvilluar me presidentin kinez, Xi Jinping, tha se veprimi ushtarak kundër Koresë së Veriut nuk është zgjedhja e parë.
“Presidenti Jinping dëshiron që të bëjë diçka, të shohim nëse ai mund ta bëjë apo jo. Por, nuk do të tolerojmë atë që po ndodh në Korenë e Veriut”, u tha gazetarëve Tramp në Shtëpinë e Bardhë.
Ndërkohë, NATO u ka bërë thirrje shteteve të Botës që të shtojnë presionet mbi Korenë Veriore, pas provave të reja nukleare të këtij vendi.
Ambasadorët e NATO-s thanë pas takimit në Bruksel se “tani është e rëndësishme që të gjitha shtetet në mënyrë transparente të zbatojnë sanksionet ekzistuese, të cilat Kombet e Bashkuara ia kanë vendosur Koresë Veriore”.
Ata kanë kërkuar që të shtohet presioni mbi Korenë Veriore, në mënyrë që ky shtet të heqë dorë nga rruga e tanishme e kërcënimit dhe destabilizimit.
NATO po ashtu ka shprehur solidaritet të plotë me fqinjët e Koresë Veriore, Japoninë dhe Korenë Jugore.
Megjithatë, ambasadorët e NATO-s nuk kanë përmendur mundësinë e përdorimit të forcës.
Koreja Veriore njoftoi se më 3 shtator ka kryer me sukses testimin e bombës së hidrogjenit. /tesheshi.com/
