Një ekzekutim i tipit mafioz ndodhi të hënën mbrëma në Tiranë, ku viktimë mbeti i biri i një ish-gjykatësi me emër.
Klaudio Prendi, djali i ish-gjykatësit Fran Prendi, u qëllua me breshëri plumbash sapo doli nga një lokal në mesnatë duke u futur në automjetin e tij. Ngjarja ndodhi në Porcelan.
Sipas burimeve, Prendi është mbajtur nën vëzhgim dhe monitorim nga autorët, të cilët kanë pritur momentin kur 28-vjeçari është futur në automjetin e tij G-Class dhe kanë qëlluar me breshëri. Pesë plumba kanë prekur të riun i cili u dërgua me urgjencë në spitalin e Traumës në gjendje të rëndë për jetën, por nuk arriti të mbijetonte.
Ngjarja e rëndë është shënuar rreth orës 01:40, ndërsa një orë më vonë në zonën e Farkës është gjetur e djegur makina e autorëve.
Hetuesit e krimeve në kanë konfirmuar se bëhet fjalë për makinën e përdorur në atentatin ndaj 28-vjecarit. Mjeti i djegur është me targa të huaja.
Nuk dihet nëse kjo vrasje është për shkaqe që kanë të bëjnë drejtpërdrejt me viktimën apo me të atin e tij, funksionin që ka patur në drejtësi, pasi ka dhënë verdikte për emra famëkeqinj të krimi, si fjala vjen, Emiljano Shullazi. Por Fran Prendi prej kohësh nuk është më në radhët e drejtësisë, pasi u vetëlargua, pa hyrë në veting, me arsyetimin e angazhimit në biznes privat. /tesheshi.com/
