Dy ish-krerë të Drejtorisë së Përgjithshme të Rrugëve, Andi Toma dhe Dashamir Xhika, kanë përfunduar në pranga pas një urdhërarresti lëshuar nga Prokuroria e Elbasanit. I pari ka shërbyer në këtë post që nga viti 2008 e deri në 2013.
Toma akuzohet për shpërdorim fondesh deri në 5 miliard lekë. I dyti, një zyrtar i LSI-së, akuzën e ka të lidhur me shembjen në një pjesë të aksit të ri Tiranë – Elbasan. Hetimi ndaj tij ishte paralajmëruar nga ministri Gjiknuri pak javë më parë.
Sakaq, Shkëlzen Berisha, i biri i ish-kryeministrit Berisha, është thirrur në Prokurori për të dëshmuar rreth rolit të tij në aferën CEZ.
Është ky një sinjal se dosja e përfolur, ku dyshohet se janë përfshirë shumë aktorë politikë gjatë aleancës PD-LSI të viteve 2009-2013, do hapet sërish për t’u çuar përfundimisht në gjykatë, pas një mbylljeje në fund të mandatit të Llallës.
Interesant është dhe arrestimi i ish-drejtorit të Rrugëve, Andi Toma, ndodhur në një distancë kohore pas 5 vitesh nga lënia e detyrës.
Si për Tomën e si për Xhikën, nuk mund të thuhet se futen te “peshqit e mëdhenj”, por për rëndësinë që kanë patur dhe llojin e postit që kanë mbajtur, mund të thuhet se një paralajmërim i afrimit tek “të mëdhenjtë”. /tesheshi.com/
