Ndër marrëzitë e pakapërdishme të medias shqiptare është të trajtuarit e Nard Ndokës si faktor politik.
Do ishte harruar si emër, ngase nuk ka asnjë arsye për të qenë emër i veçuar në jetën publike, sikur naiviteti mediatik të mos e telefononte për ta intervistuar. Intervistuar për çfarë?
Nard Ndoka, një figurë dhe me theks komik, u bw paksa i rëndësishëm me një partiçkë të tijën gjatë kohës së Berishës, duke arritur të bëhet dhe ministër Shëndetësie. Por nuk ka aspak dilemë se ai është thjesht një aksident politik, siç dhe të tjerë si ai, si fjala vjen Meta, kryeaksidenti i politikës shqiptare në 30 e kusur vite.
Mirëpo i ka ndritur fati që ende të mbahet gjallë, pasi vijojnë ta ftojnë në studio për të folur për…asgjënë. Me një fjalë, nuk thotë asgjë, pasi kurrë nuk ka thënë ndonjë gjë, pasi dhe në politikë është endur rreth asgjësë.
Ja, së fundi ishte në A2 CNN. Mjafton se si kjo media ja ka servirur publikut, me ç’titull, për të kuptuar se si binjakëzohen në kotësi e marrëzi media me politikën. Titulli është: “Rama-Veliaj, dy hajdutë që shantazhojnë njëri-tjetrin”.
Pra, vetëm për kaq është marrë në intervistë. Kaq është limiti i Ndokës, kaq është dhe limiti gazetaresk.
O kolegë gazetarë, personi që ftohet, duhet të gëzojë një status të caktuar dhe të arsyetuar se pse ftohet. Nard Ndoka nuk gëzon asnjë status veç atij të një figure të rëndomtë të politikës periferike, pa asnjë peshë elektorale, dhe mbi të gjitha pa asnjë kapacitet ligjërimor apo botëkuptimor. Duhet të ekzistojë dhe një lidhje e fortë arsyetuese mes atij dhe tematikës për të cilën flitet, gjë që dhe në këtë rast mungon.
I vetmi rast që mund të ftohet, meqë ka drejtuar apo drejton një partiçke më konotacion fetar – demokristian – do ishte ai mbi qasjet katolike mbi një zhvillim të caktuar politik. Por dhe në këtë rast, ai nuk përmbush asnjë kriter prej katoliku të shquar dhe me peshë në jetën katolike, të cilit mund t’i referohesh për diçka katolike. Është thjesht një emër i rëndomtë që nuk i thotë asgjë inteligjencës më minimale të publikut. Dhe kësisoj, është parespekti gazetaresk për publikun dhe veten që çon një kanal me emër prestigjoz t’i ofrojë për drekë publikut lëtyrën e ftohur e pa yndyrë me emrin Nard Ndoka. /tesheshi.com/
