“Kaubojsi” i Parlamentit, Eduard Ndocaj, ai që bëri gurgulenë për pllakën e Sulejmanit në kalanë e Lezhës, nuk di të bëjë betimin si deputet.
Kolegu i tij jo vetëm në famë publike, por edhe në botëkuptimin demokristian, Nard Ndoka, deklaroi në një intervistë për Report tv se i ka mësuar Ndocajt të bëjë betimin në Kuvend. Ky akt pritet të ndodhë pas vendimit për ta pranuar si parlamentar të ri të qarkut të Lezhës, për shkak të dorëheqjes së mbi pesë deputetëve të mazhorancës.
“Kam pasur kontakte të vazhdueshme me Ndocajn mbi procedurat parlamentare që ndiqen, për betimin. Ndocaj ka qenë në listat e PS-së dhe është produkt i asaj force politike.
Eshtë vetë vendimi i Ndocajt që të jetë pjesë e kësaj mazhorance, përderisa dhe PDK-ja është pjesë e saj; nuk ka problem sa i përket qëndrimit politik.
Eshtë tip ndryshe nga parlamentarët klasikë që jemi mësuar të shikojmë, është profesional në stilin e tij. Nuk është rritur në Shqipëri, por është rritur jashtë vendit, ku ka ndërtuar biznesin e tij të suksesshëm,” thotë Ndoka.
Kreu i demokristianëve tregon se ka qenë në Milano përpara një viti dhe ka nënshkruar një marrëveshje për votën e emigrantëve, që të përfaqësohen në Kuvendin e Shqipërisë duke votuar në zgjedhje.
Ndoka rrëfen sesi e tërhoqi Ndocajn në radhët e demokristianëve.
“Unë nuk kam pasur njohje më parë; njihemi kohët e fundit. Eshtë treguar korrekt në bashkëpunimin që patëm, dhe e përfshimë në Partinë Demokristiane. Nuk kishte lidhje fare me parlamentin. Eshtë tipi i tij; fjala kaubojs është e madhe. Ai është cilësuar kështu nga një kapele që ka dëshirë ta mbajë,” tha Ndoka.
Këshilli për Rregulloren, Mandatet dhe Imunitetin, miratoi këtë mëngjes propozimin e Komisionit Qendror të Zgjedhjeve për t’i dhënë mandatin e deputetit Eduard Ndocajt, vend ky i lënë bosh nga deputeti Arben Ndoka, i dorëhequr pak kohë më parë.
Pas një kafeje me nënkryetarin e grupit parlamentar socialist, Taulant Ballën, deputeti më i ri ka ngjitur shkallët e parlamentit shqiptar për të bërë betimin në seancë plenare. Në duar mbante një dosje portokalli, si ngjyrat e Partisë Demokristiane të Nard Ndokës. /tesheshi.com/
