Skuadra e Napolit ka djersitur jo pak për të marrë 3 pikët e rradhës në Seria A. Skuadra e Sarrit ka luajtur një ndeshje karakteri kundër Sampdorias, kur është gjendur 2 herë në disavantazh, por duke arritur të përmbysë gjithçka, me një fitore 3-2.
Një gol i beftë i Ramirez, i bëri të qartë të kaltërve se nuk do ta kishin të lehtë. Por pas 10 minutash, Allan vendos paqen në fushë. Një ish-sulmues napolitan, Qualiarella, i gjallëruar shumë tek Sampdoria, kalon sërish në avantazh dorianët, por pas 5 minutash, Insigne ka barazuar rezultatin. Pas 7 të tjerave, një tjetër gol historik i Hamsik, i cili jo vetëm shënon golin e fitores, por edhe tejkalon legjendën Maradona, në numrin e golave të shënuar me Napolin.
Skuadra e Sarrit është detyruar të shtrëngojë dhëmbët 15 minutat e fundit, pas kartonit të kuq të Mario Rui. Ndërkohë një tjetër ndeshje fatale për Interin e Spalletit, i cili është mundur 1-0 jashtë fushe nga Sassuolo.
Një gol i Falcinellit ishte një goditje e beftë për Interin, i cili në pjesën e parë nuk mundi të krijojë shumë. Ndërsa në të dytën, një penallti në favor të tyre, krijoi bindjen se skuadra do të rikthehej tek përmbysja.
Por bomberi Icardi gabon nga 11 metra dhe Interi humb më shumë toruan, duke mos arritur të bëhet veçanërisht kërcënues.
Në ndeshjet e tjera të së shtunës, Lazio fitoi 4-0 me Crotone, Genoa merr në fund të ndeshjes, 3 pikë të rëndëisshme ndaj Beneventos, ndërsa Udinese vijon me rezultate pozitive, duke mundur 3-0 Veronën. Napoli shkëputet edhe më shumë nga Inter, i cili ka zbritur në vendin e tretë. /tesheshi.com
