Thuaj Maradona, e ke thënë futboll. Thuaj Maradona, e ke thënë probleme.
Figura gjigande diabolike e sportit më masiv në planet, ka marrë vlerësimin si Qytetar Nderi i Napolit. Mes lotësh e emocionit, El Pibe D’oro është shprehur se e ka ëndërruar këtë vlerësim nga qyteti të cilin e bëri të famshëm përmes fushës së lojës.
Diego tha për gazetarët se ka qenë një dëshirë gati në amanet e nënës së tij që nuk jeton më, që ai të rikthehej si “i nderuar” në Napoli, pas problemeve fiskale, çmendurive të rinisë e përdorimit të ndonjë substance të ndaluar, që e detyruan të largohej.
Megjithatë kur dikush nga gazetarët e provokoi duke i thënë se kishte marrë 300 mijë euro për të ardhur në Napoli, Maradona “nxorri bishën” që mban brenda: “Unë paratë e mia i kam marrë në Napoli, kur luaja në fushë. Këtu vij se është çështje zemre. Kam mjaftueshëm para në Dubai.
Kush e thotë që kam marrë para, ma nxirrni para syve se do ta pështyj në fytyrë”- ishte reagimi i legjendës argjentinase. Në fakt, mes akuzatorëve dhe sinqeritetit të Diegos, njerëzit në Napoli janë të prirur të besojnë idhullin e tyre, që Napolin e bëri të madh, duke i dhënë 2 tituj kampionë e një kupë UEFA. /tesheshi.com/
