Arkadiusz Milik është sulmuesi më i ri i Napolit. 22-vjeçari ka lënë Ajaksin në Holandë për t’iu bashkuar napolitanëve, në një sfidë të re për të.
“Mirë se vjen Milik,” shkruajti në Twitter presidenti i Napolit, De Laurentiis. Megjithatë, blerjes më të re i është dhënë bluza me numër 99, duke ia lënë me sa duket dikujt tjetër numrin 9.
Vetë polaku do ta përshkruante kështu transferimin, “Eshtë nder të bëhem pjesë e Napolit, me tifozët e tij të mrekullueshëm, plot pasion. Një klub i madh, me një histori të lavdishme. Dëshiroj t’i bëj të lumtur këta tifozë fantastikë të Napolit.”
Milik ra në sy në Euro 2016-tën, pasi bëri paraqitje mjaft të mira me Poloninë, shpesh duke lënë në hije dhe Lewandowski-n.
Qendërsulmuesi polak do të shënonte 21 gola në sezonin e shkuar me Ajaksin në kampionatin holandez, edhe pse vetëm në fazën e dytë do të bëhej pjesë e formacionit të rregullt.
Kontrata e tij me Napolin është katërvjeçare, duke përfunduar në fund të qershorit të vitit 2021. /tesheshi.com/
