Skuadra napolitane iu gëzua fitores së parë në kampionatin italian në javën e dytë të tij. Përballë Milanit, napolitanët kanë treguar karakter, duke fituar 4-2.
Ka qenë një ndeshje që ka patur shumë gola, por dhe dy kartona të kuq për udhëtuesit.
Polaku Milik ka deputuar para tifozëve vendas në “San Paolo” me dy gola. Një nisje e shkëlqyer për të, i blerë me synimin për të mbushur boshllëkun që la largimi i Higuain-it.
Dy golat e polakut u shënuan në pjesën e parë, ndërkohë që lojtarët e Milanit barazuan në dhjetë minutat e pjesës së dytë. Niang dhe Suso vendosën barazimin e përkohshëm 2-2.
Për t’u bërë protagonist më pas Callejon, që shënoi për Napolin në minutën e 74-të dhe të 93-të. Veçse gjatë pesëmbëdhjetë minutave të fundit, Milani do të luante me nëntë lojtarë, pas daljes me të kuqe të Kucka-s dhe Niang-ut.
Milik do të deklaronte pas fitores 4-2 e pas dy golave të tij: “Ishte si një ëndërr. Pjesa e parë ishte vërtet e përsosur për mua, dy raste dhe dy gola. Gjëja më e rëndësishme është fitorja e klubit, prandaj jam vërtet i lumtur dhe i kënaqur.”
Arkadiusz Milik, polaku 22 vjeçar, u transferua këtë verë nga Ajaksi, por të paktë kanë qenë ata që kanë besuar se kjo ishte një blerje e duhur për Napolin. Polaku ka nisur t’i zhgënjejë skeptikët. /tesheshi.com/
