Konflikti midis ushtrive azerbajxhanase dhe armene për rajonin e Nago-Karabakut nuk u qetësua as të mërkurën.
Marrëveshja e armëpushimit me ndërmjetësimin e Shteteve të Bashkuara, e cila hyri në fuqi vetëm dy ditë më parë, nuk e ndaloi luftën, e cila është faza e fundit e konfliktit prej dekadash.
Zyrtarët e Nago-Karabakut thanë të mërkurën se forcat azerbajxhanase vunë në shënjestër Stepanakert, kryeqytetin e rajonit dhe Shushin afër me lëshuesit e raketave me shumë tytë Smerch, duke vrarë një civil dhe plagosur dy.
Qendra e informacionit e qeverisë armene tha se forcat Azerbajxhanase shënjestruan spitalin e lindjes në Stepanakert.
Ministria e Mbrojtjes e Azerbajxhanit hodhi poshtë këto pretendime dhe akuzoi forcat armene për përdorimin e “Smerc” kundër qyteteve të Azerbajxhanit Terter dhe Bard, ku më shumë se 20 njerëz u vranë dhe 60 u plagosën.
Një zëdhënëse e Ministrisë armene të Mbrojtjes, Susan Stepanjan, u përgjigj se akuzat ishin “të pabazuara dhe të rreme”.
Presidenti i Azerbajxhanit, Ilham Aliyev, në Twitter premtoi një “përgjigje adekuate” ndaj sulmit.
Karabaku është zyrtarisht pjesë e Azerbajxhanit, por Baku nuk ka pasur kontroll mbi rajonin kryesisht armenë që nga viti 1994, qeveria separatiste e të cilit ka mbështetjen e Jerevanit.
Lufta e fundit, e cila filloi më 27 shtator, është konflikti më i vështirë që nga fundi i vitit 1994.
Sipas zyrtarëve të Nago-Karabakut, 1,068 ushtarë të tyre dhe 39 civilë u vranë dhe 122 civilë u plagosën këtë vjeshtë. Autoritetet azerbajxhanase nuk kanë njoftuar humbjet e tyre ushtarake, por thonë se 69 civilë janë vrarë dhe 322 janë plagosur në përleshje.
Presidenti rus Vladimir Putin tha javën e kaluar se Moska kishte informacione se gati 5,000 njerëz kishin vdekur në konflikt.
Rusia, Shtetet e Bashkuara dhe Franca bashkëkryesojnë të ashtuquajturin “Grupi i Minskut” të ngritur nga Organizata për Sigurinë dhe Bashkëpunimin në Evropë për të ndërmjetësuar konfliktin, por përpjekjet e tyre për të negociuar një zgjidhje politike kanë ngecur.
Presidenti i Azerbajxhanit Ilham Aliyev ka kritikuar vazhdimisht grupin për dështimin për të arritur ndonjë rezultat në 28 vjet, duke theksuar se Azerbajxhani ka të drejtë të rifitojë territorin e tij me forcë, pasi ndërmjetësimi ndërkombëtar ka dështuar. /tesheshi.com/
