SHELL-i, kompania e njohur hollandeze e shpim-kërkimit të naftës, do jetë ajo që ka marrë në dorë Bllokun nr. 4 në Shpirag, atje ku mendohet se ka rezerva të mëdha nafte. I pranishëm në firmosjen e kontratës me qeverinë shqiptare, kryeministri Rama ka shfrytëzuar dhe rastin për t’i përcjellë Hollandës, më saktë qarqeve ksenofobe të saj, disa mesazhe të karakterit politik
“Kjo marrëveshje rrit më shumë praninë e Hollandës si një vend prej nga ku vjen një sasi e konsiderueshme e investimeve të huaja. Kjo do të vlejë që në Hollandë, Shqipëria të shihet si e plotë dhe jo e pjesshme a thua se këtu nuk ka asgjë përveç krimit të organizuar. Prania e një kompanie si SHELL përbën një arsye më shumë për kompanitë e tjera për ta parë Shqipërinë jo siç përshkruhet në media apo siç e dëshirojnë forca politike që janë kundër zgjerimit të BE”, tha Rama.
Nga ana tjetër, shefi i qeverisë u shpreh entuziast për përfitimet e dyanshme nga ajo që ndodhet në nëntokën e Shpiragut.
“SHELL i nuk e bën këtë nga ndonjë dashuri nënëtereziane për Shqipërinë, por si pjesë e vizionit të vet të zhvillimit dhe i inkurajuar nga të dhënat e eksplorimeve të fundit dhe treguesit për një rezervë të re nafte që është padiskutim më e madhja deri sot në Shqipëri dhe presim me padurim të mësojmë sesa”, theksoi Rama. /tesheshi.com/
