Rafael Nadal është gjithmonë shpërthyes kur luhet në fushat me dhé të kuq, mjafton që të jetë në formë fizikisht.
Ish-numri një i botës po i afrohet edhe një herë atij pozicioni me fitimin e njëpasnjëshëm të turneve në këtë periudhë të vitit.
Sot ai ka shkëmbyer vendet me Roger Federer-in, e është ngjitur në vend të katërt në renditjen botërore të tenistëve meshkuj, shumë pranë dhe tenistëve më sipër.
Nadal ka triumfuar në turneun e tretë rresht, duke u bërë gati për French Open-in, Grand Slam-in e dytë të vitit.
Në finalen e turneut Madrid Open, ai është ndeshur me austriakun Dominic Thiem, të cilin e pati mundur dhe në finalen e turneut Barcelona Open dy javë të shkuara. Spanjolli fitoi dhe këtë herë 2-0, në një ndeshje tejet të vështirë, ku vetëm seti i parë, i fituar me tiebreak, do të kërkonte një orë e 18 minuta për të përfunduar.
Me setet e fituara 7-6 dhe 6-4, kjo ishte fitorja e 15 sezonale për Nadal-in në fushat me dhé të kuq, pa njohur njëkohësisht humbje.
Nadal e fitoi për herë të pestë trofeun e turneut Madrid Open. Ky ishte titulli i 72-të në karrierë për të, dhe i 52-ti në fushat me dhé. /tesheshi.com/
