Rafa Nadal mbetet tenisti numër një i fushave me dhé të kuq, dhe këtë e konfirmoi dhe sot, kur shpartalloi Novak Djokovic-in.
Gjysmëfinalja e turneut Madrid Open i vuri përballë dy ish-numrat një të botës në takimin e 50-të mes tyre.
Një fitore e shumëpritur e spanjollit ndaj serbit, që vjen pas shtatë humbjesh; e para fitore e Nadal-it karshi Djokovic-it që nga finalja e French Open-it e vitit 2014.
Nadal e mposhti kundërshtarin me rezultatin e përgjithshëm 2-0. Seti i parë foli veç për spanjollin, që e mbylli atë 6-2. Pasardhësi, seti i dytë, ishte shumë më i ekuilibruar, me Djokovic-in që pati momente kur shfaqi një pjesë të potencialit të tij të lartë tenistik. Në fund, seti u mbyll 6-4 për Nadal-in.
Kjo ishte fitorja e 14-të e njëpasnjëshme e Nadal-it në fushat me dhé, e siguruar në një terren ku u panë ta ndiqnin atë dhe emra të njohur të Realit të djeshëm dhe të sotëm, Raul dhe Cristiano Ronaldo.
Në finalen e gjashtë të vitit, Nadal do të ketë rival në anën tjetër të fushës austriakun Dominic Thiem ose uruguajanin Pablo Cuevas, në varësi të rezultatit të gjysmëfinales së dytë, që luhet sonte në orën 21:30. /tesheshi.com/
