Dy spanjollët janë takuar rishtas në turneun Indian Wells Masters, apo, ndryshe, BNP Paribas Open, në Kaliforni, dhe Rafa Nadal i ka kthyer reston bashkëkombasit për atë humbje të turpshme në raundin e parë të Australian Open në janar të këtij viti.
Ndeshja mes tyre qe e vlefshme për raundin e tretë të këtij turneu. Nadal, që e ka fituar tre herë këtë aktivitet, vihej përballë Fernando Verdasco-s në pozita dukshëm të pafavorshme. Ai i ka humbur tre nga katër ndeshjet e fundit me këtë rival.
Ish-numri një i botës e nisi vrullshëm setin e parë, të cilin e fitoi 6-0. Por në setin e dytë, që u vendos me tiebreak, ai ndjeu goxha vështirësi. Nadal fitoi 7-6 në këtë set, që qe dramatik në fundin e tij, dhe e mbylli tërë ndeshjen 2-0, duke kaluar në raundin e katërt.
“Normalisht që ai shërben më mirë se unë. Në këto lloj ndeshjesh kam për të humbur më shumë se ai, prandaj ai është në gjendje të luajë në mënyrë shumë agresive,” tha Nadal pas fitores.
“Ndjehem me fat që fitova tiebreak-un, e në të njëjtën kohë mendoj se luajta mirë në fund të tij, pa shumë gabime,” shtoi spanjolli fitues.
Ndërkaq, tenisti më i mirë në botë për momentin, Novak Djokovic, mundi në këtë raund gjermanin Philipp Kohlschreiber. Ndeshja u fitua 2-0 për serbin, që nuk e pati të lehtë në të dy setet, të mbyllura me të njëjtin rezultat, 7-5, 7-5. /tesheshi.com/
