Spanjolli Rafa Nadal ka siguruar finalen e dytë për këtë vit në tenis, në një përpjekje të fortë të tij për t’u kthyer në nivelet më të larta.
Nadal do të luajë finalen e tij të dhjetë në turneun Monte Carlos Master, nga i cili ka veç kujtime pozitive. Ai ka fituar për tetë vite rresht në këtë turne, nga 2005-a në 2012-ën, me 46 fitore të njëpasnjëshme, për të humbur në 2013-ën po në finale ndaj serbit Djokovic.
I pakrahasueshëm në fushat me dhe të kuq, Nadal ka zhvilluar sot një gjysmëfinale drithëruese ndaj britanikut Andy Murray, ndaj të cilit fitoi 2-1.
Murray surprizoi në setin e parë, duke e bërë të tijin me rezultatin 6-2. Kthimi i spanjollit në lojë e pa atë t’i fitonte dy setet pasuese me shifrat 6-4 dhe 6-2.
“Diçka nuk shkoi mirë në setin e parë,” ka thënë Nadal pas gjysmëfinales. “Por mendoj se zhvillova një set të dytë të madh sa ka të bëjë me mentalitetin. Në të tretin luajta agresivisht. Ishte një ndeshje e madhe,” ka shtuar ai.
Në gjysmëfinalen tjetër, mes dy tenistëve francezë, Monfils e mposhti 2-0 Tsonga-n. Me një dominim të plotë, Monfils i fitoi setet 6-1 dhe 6-3.
Në takimet mes tyre, Nadal ka 11 fitore ndaj francezit Monfils, kurse ky ka fituar vetëm dy herë ndaj spanjollit. Nadal ka dalë fitues në tre përballjet e fundit, e fitorja e fundit e Monfils-it ndaj tij është katër vite të shkuara, në gjysmëfinalet e turneut të Dohas. /tesheshi.com/
