Këto ditë në tregjet periferike të Lushnjës ka filluar tregtimi i prodhimeve të patates së re, ardhur kryesisht nga zona bujqësore e Divjakës. Shumë prej fermerëve i çojnë prodhimet në treg, ndërsa të tjerë e sheshin direkt e nga ara për shkak të transportit i cili rrit më tej kostot.
Gjithsesi, sipas fermerëve, duke u nisur nga çmimet e naftës dhe plehrave kimike, çmimi është relativisht i ulët dhe fitimi është minimal. Përveç farës që është e shtrenjtë, fermerët ankohen edhe për çmimin e lartë të karburanteve dhe pesticideve.
Ata kërkojnë ndihmën e shtetit për të ulur koston. Divjaka dhe fshatrat përreth, thonë fermerët, janë ndër zonat më prodhuese të produkteve bujqësore në Shqipëri. Ata kërkojnë ndihmën nga shteti me subvencione dhe lehtësira në kreditime, në mënyrë që ky sektor të zhvillohet edhe më shumë. Ndërkohë, duke qënë pataja e re, fermerët që e prodhuan me shpejt dhe dolën herët në treg ndjehen të privilegjuar, pasi dhe kërkesat për këtë prodhim të tanishëm janë të mëdha.
“Kam mbjellë 3 dynym patate”, thotë një fermer. “Prodhimi i këtij viti është pak i dobët. Ne shikojmë në rradhe të parë mbulimin e shpenzimeve dhe pastaj shikohet fitimi. Po për ne në Divjakë, bereqavers që e shesim prodhimin në vend dhe nuk kemi pse të kërkojme treg jashtë zonës.
Këtë e kemi fitim se vetëm makina për ta transportuar kërkon 30 mijë lekë (të vjetra) për në Tiranë, Fier e ngado. Sot jam duke e shitur kilen me 400 lekë, dje e kam shitur me 420. Shpenzimet i mbulojmë por fitimi është pak i vogël duke pasur parasysh edhe shpenzimet e punimeve të tokës dhe mbjelljes”, thotë fermeri.
Mark Brunga – /tesheshi.com/
