Disa dhjetëra myslimanë Rohingya falën namazin e Bajramit të shtunën në Bangladesh, shumë prej të cilëve sapo kishin mbërritur, pas largimit nga shpërthimi i dhunës në Myanmar.
Festa e Bajramit vjen ndërkohë që aparati shtetëror i Rakhine të Myanmarit ka detyruar mijëra Rohingya, një pakicë pa shtetësi, që të kërkojnë strehim në Bangladesh.
Ky është kapitulli më i përgjakshëm në krizën tashmë pesëvjeçare, që ka ndarë Rakhinë përgjatë vijave etnike dhe fetare, duke zhvendosur popullatën Rohingya në masë të madhe, dhe ka provokuar reagime ndërkombëtare, të cilat dënojnë veprimet e ushtrisë së Myanmarit dhe qeverisë së Aung San Suu Kyi.
“Kam pasur gjithçka në shtëpinë time, por tani jam kthyer në një refugjat, nuk ka asgjë për të festuar, por është detyra jonë të falim namazin e Bajramit”, tha 39-vjeçari Makbul Hossain, i cili udhëtoi mes rreziqesh nga Rakhine në qytetin kufitar të Bazar Cox në Bangladesh, javën e kaluar.
Fermeri 60-vjeçar Deen Mohammad, tha se u detyrua të largohej për sigurinë e tij pas shpërthimit të dhunës në fund të gushtit.
“Kur filloi lufta, lashë shtëpinë dhe fermën me gjithçka. Kam mbetur pa para këtu,” tha ai për AFP, duke shpërthyer në lot. /tesheshi.com/
