Çeçenët nuk janë të vetmit myslimanë që marrin pjesë në luftën e Ukrainës. Përveç forcave çeçene të Ramzan Kadyrov që i shërbejnë Putinit, dy njësi vullnetarësh çeçenë po luftojnë në anën e Ukrainës, një grup i quajtur “Dzhokhar Dudayev” dhe një grup tjetër i quajtur “Sheikh Mensur”.
Megjithatë, çeçenët nuk janë të vetmit myslimanë që ndihmojnë ukrainasit.
Said Ismailov, një nga udhëheqësit më të lartë muslimane të Ukrainës, postoi një fotografi të tij me uniformë ushtarake së bashku me disa myslimanë tatarë të Krimesë nga Mbrojtja Territoriale në Kiev.
Në Krime, një gadishull ukrainas i aneksuar ilegalisht nga Rusia në vitin 2014, tatarët si grup etnik mysliman i kanë rezistuar pushtimit rus që nga viti 2015, dhe disa tatarë po luftojnë gjithashtu në forcat e armatosura të Ukrainës.
Në videon, e cila u shpërnda edhe nga mediat ukrainase, kreu i komunitetit mysliman në Krime, Ayder Rustemov, u bëri thirrje myslimanëve ukrainas të mbrojnë vendin e tyre – dhe myslimanëve rusë të dënojnë agresionin rus.
Shumica e muslimanëve në botë kanë dënuar sjelljen e luftëtarëve çeçenë të Ramzan Kadyrovit, si dhe këtë të fundit, veçanërisht nxjerrjen e fetvave se pjesëmarrja në agresionin kundër Ukrainës është xhihad në rrugën e Allahut. Por ka edhe nga ata që kritikojnë myftiun ukrainas dhe bashkëpunëtorët e tij për thirrjen e vullnetarëve myslimanë që të përfshihen në mbrojtjen e Ukrainës. /tesheshi.com/
