Ministrat e Jashtëm të Vatikanit dhe Kinës u takuan të premten, njoftoi Vatikani dhe, sipas shumë mediave, një takim i një niveli kaq të lartë ka munguar për dekada.
Takimi midis Arqipeshkvit Paul Gallagher dhe Wang Yia, i cili ishte i paimagjinueshëm në të kaluarën, u zhvillua në kuadër të Konferencës së Sigurisë së Mynihut.
Ata diskutuan një marrëveshje historike të vitit 2018 midis Vatikanit dhe Pekinit që i jep të drejtë Selisë së Shenjtë që të emërojë një peshkop në Kinë, gjë e cila ka qenë një çështje e diskutueshme për një kohë të gjatë. Sipas një deklarate nga Vatikani, takimi ka qenë i “përzemërt”.
Të dy palët ranë dakord për të ndjekur një “dialog institucional, dypalësh”, nga i cili të përfitonte Kisha Katolike dhe populli kinez.
Marrëdhëniet midis Vatikanit dhe Pekinit janë vlerësuar të jenë përmirësuar që kur u arrit marrëveshja.
Takimi i së premtes ishte i fundit në një seri që sugjeron përmirësimin e marrëdhënieve javët e fundit, sipas Reuters.
Muajin e kaluar, Papa vlerësoi angazhimin e madh të Kinës për të luftuar koronavirusin, dhe më pas shërbimi humanitar i Vatikanit dërgoi qindra mijëra maska në Kinë, si një shenjë e bashkëpunimit.
Shumë e shohin marrëveshjen e vitit 2018 për emërimin e një peshkopi si pararendëse për rivendosjen e marrëdhënieve diplomatike pas një ndarjeje më shumë se 70 vjet më parë, sipas agjencisë franceze AFP.
Nëse rivendosen, Vatikani do të duhet të ndëpresë marrëdhëniet diplomatike me Tajvanin, të cilin Pekini e konsideron pjesë të territorit të tij. Marrëdhëniet diplomatike midis Kinës dhe Vatikanit u prishën në 1951.
Vatikani është i vetmi në Evropë që njeh akoma Taipei.
Media e Pekinit raportoi të shtunën se takimi i parë midis ministrave të jashtëm kinez dhe Vatikan ishte “një vazhdim i një takimi midis Kinës dhe Vatikanit që po vazhdon për ca kohë”. /tesheshi.com/
