Kryeministri i Kosovës, Isa Mustafa, në një konferencë të jashtëzakonshme të mbajtur për mediat në orën 19:30 ka konfirmuar moslejimin e hyrjes së trenit serb në territorin e shtetit.
Ai ka thënë se një veprim i tillë është ndërmarrë pas takimeve që kanë mbajtur të gjitha institucionet relevante dhe Këshilli i Sigurisë Kombëtare, por edhe pas takimeve me përfaqësues të huaj diplomatikë.
“Ju falënderoj të gjithëve për përkrahjen e jashtëzakonshme. Qeveria me të gjitha dikasteret e saj janë angazhuar gjatë tërë këtyre ditëve që në mënyrë intensive dhe në mënyrë profesionale ta trajtojë këtë çështje. Së bashku me Veselin dhe Thaçin kemi marrë të gjitha masat që të informojmë faktorin ndërkombëtar për këtë situatë dhe po ashtu të ndërmarrim masa që na takojnë në përputhje me kushtetutën që të adresohet ky problem. Kthimi mbrapa i trenit është veprim i duhur. Nuk do të lejojmë provokime të këtilla që do të lejonin kthimin e Kosovës në konflikte të paparashikueshme,” ka deklaruar Mustafa.
Ky veprim, sipas kreut të qeverisë kosovare, është në vazhdën e synimeve të mbrapshta të Serbisë për ta destabilizuar gjendjen në Kosovë.
“Hyrja e tij në Republikën e pavarur nuk do të lejohet, ose, në rast se do të hynte, do të përballej në përputhje me ligjet e Kosovës. Jemi të përkushtuar që të mundësojmë lëvizjen e lirë, por nuk do të lejojmë provokime të tilla. Me këtë rast, më lejoni të theksoj vendosmërinë e Qeverisë së Kosovës, në bashkëpunim të plotë me presidentin dhe kryeparlamentarin, në angazhimin për të mbrojtur sovranitetin e vendit,” theksoi Mustafa.
Ai ka falënderuar dhe SHBA-në e BE-në për ndihmën në zgjidhjen e problemeve. /tesheshi.com/
