Qeveria e Kosovës më në fund është deklaruar për propozimin e projektligjit për tranformimin e FSK-së në ushtri, ku thotë se kryeministri Mustafa është njoftuar me rastin e fillimit të “Epopesë së UÇK-së”, më datën 5 mars.
Qeveria thotë se posa të marrë nga Kuvendi projektligjin me të cilin propozohet që FSK-së t’i jepet roli i ushtrisë, do ta trajtojë sipas rregullores nga Ministria e FSK-së, Ministria e Integrimeve Evropiane dhe Ministria e Financave, në mënyrë që ai të jetë në harmoni me Kushtetutën dhe të ketë mbështetje buxhetore”, njofton kumtesa nga qeveria.
Kryeministri vlerëson se themelimi i ushtrisë nuk mund të mbetet peng i Serbisë, përkatësisht Beogradit, dhe shton se avancimi i rolit të FSK-së në ushtri është në interes të të gjithë qytetarëve të Kosovës, pa marrë parasysh përkatësinë e tyre etnike.
“Qeveria e Republikës së Kosovës është e përcaktuar që Kosova ta ketë ushtrinë e saj, në suaza të hapësirës së Kushtetutës së Republikës së Kosovës dhe në mbështetje dhe bashkërenditje me partnerët tanë strategjikë, Shtetet e Bashkuara të Amerikës dhe NATO-n”, thuhet në komunikatën e ekzekutivit.
Më tej qeveria tregon se kryeministri ka marrë letër nga sekretari i NATO-s, Stoltenberg, në të cilën sekretari i NATO-s bën të qartë se do të vazhdojë bashkëpunimin me FSK-në vetëm në mandatin ekzistues.
“Në bisedën e djeshme telefonike (8 mars 2017) Sekretari i NATO-s, z. Stoltenberg ka kërkuar nga Kryeministri që të rishqyrtohet ndryshimi i mandatit të FSK-së përmes ligjit, për çfarë shprehin shqetësime anëtarët e Aleancës Veriatlantike. Qëndrime të ngjashme, Kryeministri ka marrë këtë javë edhe nga Ambasadori i Shteteve të Bashkuara të Amerikës si dhe nga Ambasadori i Mbretërisë së Bashkuar”, thuhet në kumtesë.
Ndryshe, presidenti Thaçi në konferencën e mbrëmshme tha se ai ka kryer punën dhe i mbetet Mustafës të japë vendimin për ushtrinë. /tesheshi.com/
