Marrëveshjet e reja me Beogradin i kanë dhënë fund strukturave paralele në veri të Kosovës, ndërsa kjo e fundit mori pjesë si palë e barabartë në samitin e Vjenës. Këto janë dy konkluzione të paraqitura nga kryeministri Isa Mustafa dhe ministrja për Dialog, Edita Tahiri në një konferencë shtypi pas mbledhjes së qeverisë.
“Në Vjenë kemi qenë të barabartë me shtetet e tjera. Jemi përcaktuar që të punojmë dhe të arrijmë të gjitha premtimet që i kemi dhënë për ndërtimin e shtetit. Kemi marrë obligime dy palëshe për zgjidhjen e problemeve të dyja vendeve. Këto marrëveshje i japin fund ndërhyrjes së serbëve në Kosovë, shuarjes së strukturave paralele në veri të Mitrovicës”, theksoi Mustafa.
Sipas kryeministrit, marrëveshja për Asosacionin e komunave serbe është në pajtim me pakon Ahtisari.
“Kjo marrëveshje i adresohet ligjeve të Kosovës. Kjo argumenton se Serbia i ka pranuar ligjet e Kosovës dhe Gjykatën Kushtetuese. Asociacioni nuk ka kompetenca ekzekutive. Themelimi i këtij asociacioni është në harmoni të plotë me ligjet e Kosovës”, tha shefi i qeverisë së Prishtinës.
Asociacioni, sipas tij, i nënshtrohet ligjeve të Kosovës, nuk ka karakter një etnik e objektivat e tij janë të nivelit lokal. Mustafa i është përgjigjur kështu shqetësimit të ngritur në opinion se me Asosacionin është bosnjëzuar Kosova.
Ndërkaq, zyrtarisht e njoftuar, Kosova e ka kodin e saj telefonik 00383. /tesheshi.com/
