Kryeministri Isa Mustafa ua ka bërë të qartë partive opozitare se nuk ka kthim pas sa i takon marrëveshjes së nënshkruar në Bruksel për asocacionin e komunave serbe në Kosovë. Opozita ka ndërmarrë një peticion kundër kësaj marrëveshjeje ndërsa ka paralajmëruar edhe protesta.
Por për kryeministrin Mustafa, “nuk ka kthim pas sa i përket marrëveshjeve të arritura me Serbinë pasi ato janë ratifikuar në kuvendin e Kosovës edhe me ndihmën e AAK-së”. Në këtë mënyrë, përmes një postimi në Facebook, Mustafa i kujton Haradinajt se deputetët e opozitës e kanë dhënë votën për këtë asociacion, me ratifikimin e ligjit për marrëveshjet ndërkombëtare.
Sipas tij, krijimi i asociacionit është miratuar mw 27 qershor të vitit 2013, jo me 25 gusht të këtij viti.
Më 27 Qershor të vitit 2013, thotë Mustafa, kuvendi miratoi ligjin për ratifikimin e marrëveshjes së parë ndërkombëtare të parimeve që rregullojnë normalizimin e marrëdhënieve mes Kosovës dhe Serbisë.
“Prej 88 deputetëve sa kanë votuar, 84 kanë votuar për këtë Ligj, 3 kanë votuar kundër dhe një ka abstenuar. Ndër ata që kanë votuar për këtë Ligj kanë qenë edhe 15 deputet të LDK-së, e cila atëherë ishte në opozitë, dhe 8 deputete të AAK-së, e cila po ashtu ishte në opozitë”, shkruan Mustafa në Facebook. /tesheshi.com/
