Kryeministri Kosovës, Isa Mustafa, në një intervistë për televizionin e Vojvodinës, deklaroi se do të shkojë në Bruksel për të firmosur Marrëveshjen për Asocacionin e Komunave dhe shtoi se do të kërkojë pezullimin e strukturave paralele të serbëve në Kosovë.
Në intervistën e parë për mediet serbe, Mustafa tha se “Ndjehem keq kur shkoj në Bruksel për të marrë pjesë në dialog, derisa bashkëqytetarëve të mi u është kufizuar liria e lëvizjes. Por, do të përpiqemi e shpresoj se Bashkimi Evropian pozitivisht do ta vlerësojë përmbushjen e kritereve për caktimin e datës së liberalizimit ë vizave”.
“Do të shkojmë drejt arritjes së një marrëveshje hekurudhore e ajrore ndërmjet Beogradit e Prishtinës por edhe me Maqedoninë, deklaroi kryeministri i Kosovës.
Në lidhje me presionin e opozitës për dorëheqje, Mustafa tha se nuk ka arsye për këtë dhe se ngaqë mazhoranca ka dy të tretat e Kuvendit në Kosovë nuk ka krizë politike.
“Kuvendi dhe Qeveria mund të funksionojnë pa kurrfarë problemesh, por opozita ka arsyet e veta për të penguar”, shtoi ai.
Duke folur për marrëdhëniet me kryeministrin serb, Mustafa tha se kohë pas kohe dëgjohet me Vuçiqin.
“S’kemi problem në komunikim. Më mori në telefon të dëshmonte gatishmërinë e Serbisë të ndihmonte zhdukjen e pasojave të vërshimeve që i patëm”, tha ai.
/tesheshi.com/
