Nga Blendi Gashi
Kryeministri Isa Mustafa më datë 26 dhjetor të vitit 2015-të pati deklaruar se nëse nuk u lejohet kosovarëve të lëvizin të lirë në shtetet e Shengenit, atëherë as ai dhe as kabineti i tij nuk mund të udhëtojnë në Bruksel për të zhvilluar takimin e radhës me Serbinë.
Por vetëm një muaj më vonë, pavarësisht se nuk ka ende një rekomandim pozitiv nga Komisioni Evropian, Mustafa, u ul sërish në tavolinë me kryeministrin serb, Aleksandar Vuçiç për temat e radhës.
Bajram Gecaj, zv. ministër në Ministrinë e Administrimit të Pushtetit Lokal, ka thënë për media se Mustafa e Vuçiç do të diskutojnë çështje që lidhen me dialogun, por nuk ka dhënë detaje më të hollësishme.
Shkuarja e Mustafës në Bruksel ka nxitur reagimin e ashpër të partive opozitare dhe analistëve duke thënë se premtimet e shefit të ekzekutivit kosovar zgjatin vetëm një muaj dhe njëkohësisht ka treguar sa i pafuqishëm.
Shefi i Grupit Parlamentar të Lëvizjes “Vetëvendosje” Glauk Konjufca ka thënë në një konferencë për media se kryeministri po tregohet i papërgjegjshëm me vazhdimin e bisedimeve pasi sipas tij ai ka premtuar se nuk do të shkojë në dialog pa pas liberalizim të vizave për qytetarët e Kosovës.
Konjufca kërkoi nga kryeministri Mustafa që të reflektojë duke mbajtur premtimet e dhëna qytetarëve.
Ai tha se premtimet e kryeministrit zgjasin vetëm një muaj duke shtuar se Mustafa është joserioz pasi që sipas tij dialogun e sheh si vizitë turistike për shëtitje në Evropë.
“Shkeli premtimin gjë që tregon sa të kota dhe boshe janë premtimet e tij. Kemi të bëjmë me një kryeministër joserioz i cili i han fjalët e tij shumë shpejt. Të tilla kanë qenë premtimet për punësimet. Për këto arsye Mustafa duhet ta dëgjojë zërin e qytetarëve dhe ky zë do të dëgjohet më17 shkurt , kur qytetarët masivisht do ta shprehin pakënaqësinë e tyre”, tha Konjufca.
Deputeti i NISMA-s Zafir Berisha ka reaguar duke e quajtur Isa Mustafën mashtrues politik.
“Ai para disa ditësh pati thënë se nuk do të shkojë në Bruksel pa i marrë vizat qytetarë e Kosovës, llogaritne se një kryeministër sa e mban fjalën e dhën publikishtë. Atëher çka mundë të presim nga një rrenc dhe mashtrues si ky, jo rastësisht Kosova nuk është këtu ku është”, ka deklaruar Berisha për tesheshi.com.
Analisti politik, Islam Krasniqi thotë se deklarimi dhe mosmbajtja e fjalës nga Mustafa dëshmon se pala kosovare nuk mund të vendos për fatin e vet dhe as nuk mund të vendos as për pjesmarrjen në Bruksel.
“Kryeministri Mustafa nuk mund të ketë fuqi as juridike as politike që t’i kushtëzoj bisedimet në Brukselin zyrtar, sepse ai ka humbur edhe besimin e votusve të vetë sepse nga Bruksel asnjëherë nuk jemi trajtuar si palë e barabartë me Serbinë. Me këtë veprim kryeministri i vendit tregoi se sa i pa fuqishem është në këtë mision të shtetndërtimit dhe në paaftësinë për të vendos vet”, ka deklaruar Krasniqi për tesheshi.com.
Edhe kryetari i Prishtinës, Shpend Ahmeti, përmes një postimi në rrjetin social ka sulmuar kryeministrin Mustafa për mosmbajtjen e fjalës
“E para, shpresoj se nuk shkon për shëtitje atje. E dyta, nuk besoj se e ka vënë në siklet dikënd në Bruksel që nuk shkon. E treta, nuk besoj se as ai vetë e ka besua që nuk shkon.
Për më shumë u tall edhe Vuçiqi me të duke thënë se ka qeshur shumë kur ka dëgjuar që Mustafa paska thënë që nuk shkon.
Krejt në fund, problemi i vizitave në Bruksel nuk është fare çështje që ai ka vizë e qytetarët nuk kanë. Problemi i vizitave është që këto po i kushtojnë shumë shtrenjtë Republikës. Jo në buxhet, por në koncesione të vazhdueshme antikushtetuese që po na e bëjnë shtetin jofunksional”, ka deklaruar Ahmeti.
Poashtu edhe ish kryekuvendari Jakup Krasniqi thotë se kryeministri i hëngri fjalët e veta. Por, ai thotë se problemi nuk është këtu, pasi Kosova është mesuar me njerëz të tillë, por shton se i erdhi inat pse kryeministri Mustafa u tallë keq nga Vuciqi!
“Po del se kjo i ndodhi Kryeministrit tonë, vetëm për faktin se ky nuk e njeh filozofinë tonë popullore e cila thotë: “Mate shtatë herë e preje një herë”. Kryeministri ynë nuk e matë as edhe një herë dhe e ndryshon gjithherë?! Kryeministër, populli ynë i urtë e liridashës nuk e meriton ketë tallje!
Populli ynë meriton përfaqësim tjetër! Tepër ters e ke nisur, Kryeministër! Si do ta përfundosh? Zoti të shpëtoftë!”, ka deklaruar Krasniqi.
Ndryshe, takimi i fundit në Bruksel, në fund gusht 2015,mes Kosovës dhe Serbisë, i vlerësuar si më i rëndi, kishte përfunduar me katër marrëveshje, mes tyre, edhe ajo për Asociacionin, e cila e ka futur vendin në krizë politike, tash e 4 muaj. /tesheshi.com/
