Kryeministri Isa Mustafa, i cili ndodhet në Bruksel për një vizitë zyrtare ka folur për shumë gjëra, madje edhe për sulmet në Paris por nuk ka përmendur situatën aktuale në Prishtinë ku policia është përleshur me protestuesit.
Mustafa u takua sot në Bruksel, me kryetarin e Parlamentit Evropian, Martin Schulz.
Gjatë takimit, ku ishin të pranishëm edhe zëvendëskryeministri i parë, njëherësh ministër i Jashtëm, Hashim Thaçi, dhe ministri i Integrimit Evropian, Bekim Çollaku, kryeministri Isa Mustafa, ka shprehur mirënjohjen e Qeverisë dhe të qytetarëve të Kosovës, për përkrahjen e veçantë që PE ka ofruar për Kosovën.
Kryeministri Mustafa, kërkoi përkrahjen e PE-së për liberalizimin e vizave për qytetarët e Kosovës, të cilët, siç u shpreh kryeministri, janë të vetmit në Ballkan që nuk mund të lëvizin pa viza duke mbetur të izoluar.
Kryetari i Parlamentit Evropian, Martin Schulz, shprehu mbështetje edhe për proceset integruese të Kosovës, duke përfshirë liberalizimin e vizave dhe hapat e tjerë të Kosovës.
Schulz theksoi nevojën për zhvillim të qëndrueshëm në Kosovë, duke shprehur shqetësimin rreth tensioneve të fundit politike. Ai ka shprehur përkrahjen e PE-së për vazhdimin e dialogut ndërmjet Republikës së Kosovës dhe Serbisë në Bruksel, duke vlerësuar rolin konstruktiv të Kosovës.
Gjatë takimit është biseduar edhe për aktet e fundit terroriste që ndodhën në Francë. Me këtë rast, kryeministri Isa Mustafa theksoi se këto janë probleme që kalojnë kufijtë nacionalë, duke shprehur angazhimin e fuqishëm të Kosovës në kuadër të koalicionit global kundër terrorizmit, duke përfshirë miratimin e akteve ligjore dhe masat konkrete që janë ndërmarrë.
/tesheshi.com/
