Kryeministri Mustafa ka renditur në një postim në Facebook nga Nju Jorku, punët që shtrihen përpara Kosovës dhe qeverisë së tij, duke thënë se ka shumë të tilla.
Në një postim meditativ, Mustafa u kujton qytetarëve të Kosovës se “vendi duhet të anëtarësohet në organizatat ndërkombëtare, të bëhet subjekt i barabarte në vendimmarrjen botërore dhe të përfitojë nga këto vendime. Qytetarët e Kosovës meritojnë të fitojnë lirinë e qarkullimit, pa kufizim me regjim vizash, si një e drejtë themelore për zhvillim, arsim dhe prosperitet. Pavarësia e Kosovës duhet te njihet edhe nga pesë vende të BE-së”.
“Zhvillimi më i shpejtë ekonomik mund të bëhet vetëm mbi vlera të bashkëpunimit politik dhe diplomatik me vendet e tjera, të shtetit që bazohet në ligj dhe në rregulla të demokracisë. Janë këto çështje, te cilat nuk mund t’i bëjmë vetë, për të cilat na nevojitet përkrahja e përhershme dhe mirëkuptimi nga SHBA, vendet e BE-se dhe shume vendeve tjera”, shkruan Mustafa.
Më tej, ai bën edhe një falënderim për përkrahjen amerikane.
“Arritjet historike në ndërtimin e shtetit tonë, si rast i veçantë, janë rezultat i përkrahjes së fuqishme, para së gjithash, nga SHBA”, shkruan Mustafa, duke paralajmëruar se “edhe proceset të cilat tani po i zhvillojmë po i bashkërendisim me SHBA-të dhe BE-në”.
Mesazhi duket se i adresohet opozitës që ka bllokuar Kuvendin për të kundërshtuar marrëveshjet e Brukselit, nënshkuar nga qeveria Mustafa, dhe demarkacionin me Malin e Zi. Sipas Mustafës, “bashkërendimi i veprimeve me SHBA dhe BE është e vetmja rrugë e cila na çon përpara, është rruga, të cilën e kanë përkrahur qytetarët e Kosovës me shumicën dërmuese të votës së tyre”. /tesheshi.com/
