Pas deklarimit të kryekuvendarit Kadri Veseli se “ushtria do bëhet dhe askush mos t’i fërkojë duart për prishje të marrëdhënieve me ndërkombëtarët”, duke aluduar në LDK-në, ka reaguar kryeministri, njëherësh kreu i kësaj partie, Isa Mustafa i cili i është kundërpërgjigjur kreut të PDK-së, duke ritheksuar se “ushtrinë do ta bëjnë vetëm në pajtueshmëri me SHBA-të dhe NATO-n”. Këto komente, Mustafa i bëri në shënimin e 27 vjetorit të themelimit të LDK-së në Prizren.
“Kjo assesi nuk nënkupton se ne shprehim mos qëndrueshmërinë tonë në themelimin e ushtrisë që atë ta bëjmë, por jemi të vendosur që t’i shfrytëzojmë të gjithë hapat në mënyrë që këtë ta koordinojmë me partnerët tanë strategjik sepse këtë vend e kemi bërë me këta partnerë”, tha Mustafa.
Ai po ashtu ka shprehur bindjen se shumë shpejt do të ndodh edhe liberalizimi i vizave, meqë tha se Kosova ka plotësuar të gjitha kriteret, përveç Demarkacionit, për të cilin pohoi se do ta kryejnë shumë shpejt, por që nuk dha ndonjë afat kohor. /tesheshi.com/
