Kryeministri Isa Mustafa, ka goditur sërish ekspertët e pavarur me në krye deputetin e partisë së tij, Shpejtim Bulliqi, të cilët i ka quajtur “pallavraxhi dhe zhurmaxhi”.
Ai ka thënë se ekspertët e pavarur kanë treguar letra të pavlera përmes të cilave sipas tij “po na keqtrajtojnë në emër të shkencës dhe ekspertëve të pavarur”.
Mustafa, ndërkohë ka njoftuar të ketë pranuar raportin e komisionit për matje të territorit lidhur me demarkacionin me Malin e Zi, duke thënë se ky komision ka vërtetuar se nuk humbet asnjë pëllëmbë tokë.
“Kryetari i komisionit qeveritar për matjen e territorit të Kosovës ma dorëzoi Raportin mbrëmë për të dhënat faktografike për territorin e Kosovës. Akademik Hivzi Islami, kryetar i ASHAK me një sjellje dinjitoze, urtësi dhe plotë peshë të përgjegjësisë para shtetit dhe para kombit, tha se kanë bërë një punë me përkushtim për Kosovën, ai dhe anëtarët e këtij Komisioni. U ndjeva i nderuar që një akademik si Hivzi Islami, njeri që i ka dhënë shumë shkencës së Kosovës dhe shumë kuadro këtij vendi, drejtoi punën e një ekipe profesionale e cila i ofroi faktet e fundit Kosovës për territorin e saj”, ka shkruar Isa Mustafa në Facebook.
Duke lavdëruar Hivzi Islamin për punën që ka bërë, Mustafa ka thënë se komunat e Pejës, Istogut, Deçanit dhe Junikut, ia kanë konfirmuar se nuk është humbur asnjë pjesë e territorit të tyre./tesheshi.com/
