Tekniku 66-vjeçar, mes pak emrave të spikatur të trajnimit në Turqi, nuk do të jetë më trajner i Gallatasarajit. Mustafa Denizli e ka dhënë dorëheqjen vetëm tre muaj pasi qe ulur në stolin e klubit të famshëm turk.
Ai e pati marrë detyrën në nëntor, me synimin për ta kthyer Gallatasarajin në ditët e lavdishme, por nuk ia doli dot. Ekipi i Stambollit po vuan në këtë sezon, dhe humbja e fundit 2-0 në Gaziantep ndaj Gaziantepsporit qe e papërballueshme për trajnerin veteran. Vendimit të dorëheqjes i parapriu dhe eleminimi në mesin e javës së shkuar nga Liga e Europës.
Gallatasarajit iu larguan në fund të gushtit drejt Interit të Milanos dy prej futbollistëve më të mirë, Felipe Melo dhe Alex Telles. Si të mos mjaftonte kjo, së fundi u largua për në kampionatin kinez dhe sulmuesi më i mirë i “luanëve”, Burak Jëllmaz.
Një prej tre ekipeve më të mëdha në Turqi, Gallatasaraj gjendet aktualisht në vend të pestë në renditjen e Superligës turke, 16 pikë larg Fenerbahçes së vendit të parë.
Mustafa Denizli ka drejtuar më herët kombëtaren turke, të cilën e pati çuar gjer në çerekfinalet e Euro 2000-shit, si edhe e ka fituar kampionatin me të tre ekipet e Stambollit, me Gallatasarajin, Fenerbahçen e Beshiktashin.
Ish-portieri i përfaqësueses braziliane, Claudio Taffarel, do ta drejtojë përkohësisht Gallatasarajin, gjer në gjetjen e një emri të ri për stolin. Taffarel ka luajtur në fillim të viteve 2000 për Gallatasarajin, e vitet e fundit ka qenë ngahera pjesë e stafeve drejtuese teknike të të njëjtit klub. /tesheshi.com/
