Kryeministri i Kosovës, Isa Mustafa ka deklaruar se demarkacioni në Kuvend do të procedohet ashtu siç është paraparë, duke mos përmendur ndonjë datë të caktuar.
I pyetur për kërkesat e Bashkimit Evropian që demarkacioni të procedohet para pushimeve, ai ka thënë se do të punojnë ashtu siç ka kërkuar BE.
Këto deklarata ai i bëri gjatë një vizite në fabrikën e tekstilit “KosovaTex”, ku deklaroi se Kosova ofron kushte të mira për investitorët.
Ndërkaq, deputeti i LDK-së, Shpejtim Bulliqi, e ka dorëzuar kërkesën më 20 nënshkrime të deputetëve për një tryezë të përbashkët nën patronatin e kryetarit të Kuvendit, lidhur me çështjen e demarkacionit me Malin e Zi.
Bulliqi është shprehur i kënaqur me përgjigjen e deputetëve lidhur me këtë kërkesë. Ndërkohë, opozita konsideron se kërkon kthimin e këtij procesi në pikën zero, kurse monitoruesit e punës së Kuvendit thonë se duhet të lihen anash agjendat politike në këtë proces.
Nën patronatin e kryetarit të Kuvendit, komisioni qeveritar dhe grupi i ekspertëve të pavarur pritet t’i ballafaqojnë faktet shkencore lidhur me demarkacionin me Malin e Zi.
Për këtë, deputeti i LDK-së, Shpejtim Bulliqi, i cili e kundërshton këtë marrëveshje, e ka dorëzuar tashmë kërkesën me 20 nënshkrime të deputetëve. Ai është shprehur i kënaqur me përgjigjen e deputetëve në kërkesën e tij. Ndërkohë, deputeti i PDK-së, Zenun Pajaziti, kërkon pjekuri politike në trajtimin e marrëveshjes së demarkacionit me Malin e Zi, e cila nuk dëshiron të shkojë në Kuvend si e tillë.
“Unë do të dëshiroja të mos vinte. Por nëse kjo vjen dhe nëse Komisioni Evropian është insistues në këtë drejtim, atëherë ne duhet t’i peshojmë gjërat në raport me interesat e drejtpërdrejta të qytetarëve tanë”, tha Pajaziti.
Vetëvendosje si subjekti i vetëm opozitar që merr pjesë në punimet e Kuvendit, vlerëson se nuk ka pse të diskutohet për një marrëveshje që është e dëmshme për Kosovën.
Deputeti Rexhep Selimi tha se nuk mund të fshihen nga harta 8 mijë e 300 hektarë dhe se zgjidhja është e thjeshtë.
“Ky proces duhet të kthehet në pikën zero, të vlerësohet në mënyrë profesionale edhe në mënyrë më objektive dhe të vlerësohet realiteti. Pra, nëse sot shkojmë ne dhe e blejmë një hartë të Malit të Zi në Podgoricë, atëherë pikat kufitare edhe për Malin e Zi, janë aty ku themi ne”, tha Selimi për Radio Kosovën.
Ratifikimi i marrëveshjes për demarkacionin me Malin e Zi, është vënë si kusht nga Komisioni Evropian për liberalizimin e vizave për Kosovën, gjë që është vlerësuar si padrejtësi në raport me Kosovën, për shkak se asnjë shtet deri më tani nuk e ka pasur demarkacionin kriter për ta fituar liberalizimin e vizave.
/tesheshi.com/
