Të dielën u zhvillua raundi i dytë i zgjedhjeve presidenciale në Republikën Turke të Qipros Veriore, nga ku fitues doli kandidati i pavarur Mustafa Akënxhë (Mustafa Akıncı). I sapozgjedhuri, një i majtë i moderuar, fitoi 60.5 për qind të votave kundrejt presidentit në detyrë, Dervish Erogllu (Derviş Eroğlu).
Raundi i parë i zgjedhjeve u mbajt më 19 prill, po qe i pamjaftueshëm për zgjedhjen e presidentit, pasi asnjë prej kandidatëve nuk siguroi numrin e duhur të votave. Akënxhë mori 67.035 vota në raundin e dytë, ndërsa Erogllu, një konservator, i zgjedhur president pesë vite të shkuara, mori 43.764 vota. Në votimet për zgjedhjen e presidentit të ri pjesëmarrja qe te 64 për qind, nga 176.980 që ishte numri i përgjithshëm i votuesve.
Mustafa Akënxhë u lind në vitin 1947 në Limasol. Më 1975-n u zgjodh për herë të parë në parlament, vetëm një vit pas ndërhyrjes ushtarake turke dhe ndarjes së Qipros. Në vitin 1976 u bë kryetar bashkie i pjesës veriore të Nikozisë, post që e mbajti gjer më 1990. Me rikthimin tre vite më pas në parlamentin e Republikës Turke të Qipros Veriore, mbajti një sërë detyrash, duke përfshirë atë të zëvendëskryeministrit dhe të ministrit të Turizmit.
Akënxhë e mbështeti fushatën e tij te pajtimi dhe te zgjidhja e çështjes qipriote, teksa partitë turke dhe greke po bëhen gati t’i kthehen tavolinës së negociatave për t’i dhënë fund problemit 41-vjeçar.
Një urim për Mustafa Akënxhënë erdhi nga presidenti i Qipros greke, Nikos Anastasiadis, i cili i shprehu në lidhjen telefonike gatishmërinë për të punuar së bashku.
Qiproja po fiton një rëndësi strategjike me rezervat e naftës dhe gazit rreth tij, dhe pritet që negociatat për zgjidhjen e konfliktit të kahershëm të marrin një shtysë të mëtejshme me zgjedhjen e presidentit të ri në pjesën turke, i njohur për marrëdhëniet e ndërsjellta me qipriotët grekë gjatë detyrës së tij si bashkiak. /tesheshi.com/
