Donald Trump mund ta quajë “mik” por kampioni i boksit, Muhammad Ali shfaqet qartë i pakënaqur me politikat e biznesmenit. Ali, një nga muslimanët më të njohur të Amerikës, mbrojti fenë e tij si fe të paqes dhe kritikoi ata që e keqinterpretojnë Islamin për përfitime personale, në një deklaratë që drejtohet ndaj kandidatit të avantazhuar republikan në garën e Shtëpisë së Bardhë.
“Ne, si muslimanë duhet të ngrihemi ndaj atyre që e përdorin Islamin për të çuar përpara axhendën e vet personale”, tha Ali në një deklaratë që u publikua së pari në lajmet e NBC-së. “Ata kanë tjetërsuar shumë nga të mësuarit për Islamin. Muslimanët e vërtetë e dinë ose duhet ta dinë se është kundër fesë sonë të përpiqen të detyrojnë Islamin mbi këdoqoftë”.
Edhe pse deklarata nuk përmend kandidatin Trump, ajo është një përballje e hapur me miliarderin: titullohet “Kandidatët presidencialë propozojnë ndalimin e emigracionit të muslimanëve në Shtetet e Bashkuara”, një plan që Trump e përshfaqi ditën e hënë.
Në deklaratën e tij, Ali apeloi politikanët të përdorin platformat e tyre për të edukuar amerikanët në lidhje me Islamin.
“Duke folur si dikush që nuk është akuzuar asnjëherë për korrektesë politike, unë besoj se liderët tanë politikë duhet ta përdorin pozicionin e tyre për të sjellë më shumë mirëkuptim për Islamin dhe për të sqaruar se ata vrasës të keqorientuar kanë shfytyruar pikëpamjen e njerëzve për atë që Islami është vërtet”.
Ali gjithashtu, dënon sulmet terroriste në Paris dhe në San Bernandino.
“Unë jam një musliman dhe nuk ka asgjë islame në vrasjen e njerëzve të pafajshëm në Paris apo gjetkë në botë”, tha ai. “Muslimanët e vërtetë e dinë se dhuna e pamëshirshme e të ashtuquajturve xhihadistë islamikë shkon kundër parimeve të fesë sonë”.
Deklarata e Ali nuk është e para që ai publikon për t’i ardhur në mbrojtje muslimanëve.
Rastësisht ai kishte skeduluar një intervistë me “Reader’s Digest” më 11 Shtator, 2001, të cilën vendosi ta çojë deri në fund, pavarësisht sulmeve terrroriste të atij mëngjesi.
“Për disa orë salla ishte pothuajse qetësi, ndërsa ngjarjet e tmerrshme po ndodhnin njëra pas tjetrës. Ai shikonte në heshtje në ekranin e madh të televizionit ndërsa Qendra Botërore e Tregtisë binte copash dhe thërrmohej. Dhe më pas, Ali nisi të flasë”, tregonte Howard Bingham, mik i boksierit, për atë kohë.
Pjesë nga intervista:
Bingham: Na thoni reagimin tuaj për këto sulme të këtij mëngjesi.
Ali: Vrasje të tilla nuk justifikohen kurrë. Eshtë e pabesueshme. Nuk mund të dal kurrë në mbështetje të atyre që lëndojnë njerëz të pafajshëm, gra e fëmijë. Islami është fe e paqes. Nuk promovon terrorizmin apo vrasjen e njerëzve.
Bingham: Muslimanët mendohet se janë përgjegjës për këto. Si ju bën kjo të ndiheni?
Ali: Njerëzit thonë se ishte një musliman që shkaktoi gjithë këtë shkatërrim. Jam i zemëruar që bota sheh një grup të caktuar ndjekësish të Islamit që shkaktuan këtë shkatërrim, por ata nuk janë muslimanë të vërtetë. Ata janë fanatikë racist që e quajnë veten muslimanë, duke lejuar vrasjen e mijërave.
Bingham: Kur ju u bëtë musliman, feja perceptohej si kundër të bardhëve. A ka ndryshuar kjo?
Ali: Islami i vërtetë vjen nga Meka. Të gjithë njerëzit janë të Zotit. Djalli mund të shfaqet me çdo ngjyrë.
Në këtë intervistë të 11 shtatorit 2001, Ali tha se “nuk kishte asnjë problem” me të qënit musliman në Amerikë që kur ai së pari pranoi këtë fe dekada më parë.
Dhe kur pyetet nga Bingham sesi ndjehet lidhur me fetë e tjera, Ali përgjigjet me një metaforë: Lumenjtë, pellgjet, liqenet dhe rrëketë. Të gjitha kanë emra të ndryshëm, por të gjitha përmbajnë ujë. Fetë kanë emra të ndryshëm, por të gjitha përmbajnë të vërtetën.
Trump dhe Ali tashmë janë bërë objekt i shkrimeve në media, për shkak se kur presidenti Obama shkroi në një postim në rrjetet sociale se “amerikanët muslimanë janë miq dhe fqinj të mirë në këtë vend, apo heronjtë tanë në sport”, Trump replikoi duke shkruar “Cilët?”.
Vetë Trump përgenjeshtron veten pasi në fillim të vitit, kishte postuar një foto të vjetër të tij me boksierin duke shkruar “Miku im, Muhammad Ali”.
Përgatiti Juli Prifti – /tesheshi.com/
