Muslimanët japonezë po përpiqen të tregojnë për autoritetet problemin që ka kjo popullatë. “Toka e diellit që po lind” është shtëpia e rreth 200,000 muslimanëve që nuk munden t’i varrosin njerëzit e tyre siç jua dikton besimi, raportoi Kyudo News.
Në Japoni, 99 përqind e të vdekurve janë të kremruar, dhe muslimanët, të cilët nuk e ndjekin këtë zakon, nuk kanë ku të varrosin të vdekurit e tyre. Ka vetëm shtatë varreza në të cilat një person mund të varroset sipas zakoneve muslimane. Në të njëjtën kohë, në disa rajone nuk ka fare varreza, gjë që krijon një problem shtesë.
“Trupi shpesh duhet të transportohet në varreza të largëta, të cilat mund ta dëmtojnë atë ose të çojnë në kosto të larta transporti,” tha Kuresi Harun, drejtor i përgjithshëm i Fondacionit Islamik të Japonisë.
Një nga shtatë vendet ku mund të varrosen muslimanët është varreza në Hokkaido, në qytetin bregdetar të Yoichi, por hapësira është e kufizuar.
Hirofumi Tanada, një profesor në Universitetin Waseda, argumenton se plotësimi i nevojave të muslimanëve, por edhe zakonet e feve të tjera, tani është bërë më urgjente pasi Japonia ndryshoi ligjin e saj të emigracionit në prill për të tërhequr punëtorë të huaj. /tesheshi.com/
