Organizata më e madhe muslimane në SHBA për avokatinë dhe të drejtat civile, Këshilli për Marrëdhëniet Amerikano-Islame (CAIR), ka dënuar gatshmërinë e shprehur nga kandidati republikan për president Donald Trump për mbylljen e xhamive.
“Gatishmëria e dukshme e Donald Trump-it për t’i mbyllur xhamitë amerikane që ai i quan ‘ekstreme’ është tërësisht e papajtueshme me kushtetutën dhe me parimin e çmuar të vendit tonë, të lirisë fetare,” deklaroi Robert McCaw, një prej përfaqësuesve të këshillit musliman.
“Qeveria nuk duhet të merret me vendosjen se ç’është një besim fetar apo fjalë e lirë e pranueshme. Komentet e improvizuara të Donald Trump-it janë joamerikane dhe jopresidenciale,” shtoi McCaw.
Ai i kërkoi publikisht Trump-it të sqarojë përkufizimin e tij të “ekstremizmit”, e se çfarë kriteresh do të përdoren për të mbyllur një shtëpi adhurimi.
Gjatë një interviste te Fox Business, kandidati republikan u pyet se nëse ai si president do të ndiqte shembullin e propozimit britanik për pezullimin e pasaportave dhe mbylljen e ca xhamive. Trump do të përgjigjej tepër entuziast: “Absolutisht që do ta bëja këtë. Mendoj se është mirë fare!”
Kandidatët republikanë për garën presidenciale kanë bërë herë pas here komente të debatueshme në lidhje me Islamin dhe muslimanët. Ata e kanë përfshirë në fushatën e tyre rolin e Islamit në SHBA.
Kështu, Ben Carson do të deklaronte në shtator se Islami është i papajtueshëm me kushtetutën amerikane, e se ai nuk do të mbështeste një president musliman. /tesheshi.com/
