Hamasi ka ftuar Elon Musk të shohë vetë shkallën e dhunës dhe shkatërrimit të kryer nga Izraeli në Rripin e Gazës.
Thirrja nga zyrtari i lartë i Hamasit Osama Hamdan mbërriti të martën. Një ditë më parë, miliarderi i teknologjisë, i cili zotëron Platformën X, vizitoi Kibbutz-in që ishte objektivi i një sulmi të Hamasit më 7 tetor, duke u zotuar të bëjë gjithçka që duhet për të ndaluar përhapjen e urrejtjes.
Musk u takua gjithashtu me kryeministrin dhe presidentin izraelit, ndaj dhe Hamdan e ftoi atë të vizitonte Palestinën për të marrë një përshtypje të përgjithshme.
“Ne e ftojmë atë të vizitojë Gazën për të parë vetë shkallën e masakrës dhe shkatërrimit të kryer kundër popullit të Gazës, në përputhje me standardet e objektivitetit dhe besueshmërisë,” tha Hamdan në një konferencë për shtyp në Bejrut.
“Në 50 ditë, Izraeli hodhi më shumë se 40,000 tonë eksploziv në shtëpitë e banorëve të pafuqishëm të Gazës”, shtoi ai.
Një ndryshim në qëndrime
Musk kohët e fundit është përballur me kritika se platforma X është e mbushur me antisemitizëm dhe retorikë të bardhë nacionaliste që promovon dhunën dhe urrejtjen.
Gjatë një vizite në Izrael, Musk tha se ishte i tronditur dhe se Izraeli “nuk kishte zgjidhje” përveçse të eliminonte Hamasin.
Ai gjithashtu bëri një marrëveshje që “njësitë satelitore Starlink do të operonin në Izrael vetëm me miratimin e Ministrisë së Komunikimeve të Izraelit, duke përfshirë Rripin e Gazës”, një ndryshim i mprehtë nga pikëpamjet e tij të mëparshme se ai mund të siguronte Starlink për të përmirësuar komunikimet në Gaza nga ndërprerjet prej Izraelit.
Zyrtari i Hamasit gjithashtu i bëri thirrje SHBA-së “të rishikojë marrëdhëniet (e saj) me Izraelin dhe të ndalojë furnizimin e tyre me armë”, si dhe komunitetit ndërkombëtar të dërgojë ekipe të specializuara të mbrojtjes civile sa më shpejt të jetë e mundur për të ndihmuar në nxjerrjen e mijëra trupave nga rrënojat. /tesheshi.com/
