Shprehja “Myzeqeja, hambari i mushkonjave”, tashmë vlen të thuhet për Shkupin.
Banorë të kryeqytetit maqedonas ankohen se kohëve të fundit është rritur numri i insektit gjakpirës dhe se po mbajte dritën ndezur në dhomë, prite masakrën e tyre ndaj teje për së gjalli.
Këtë vit është prolonguar spërkatja kundër insekteve për dallim nga vitet e kaluara, kur dezinfektimet e para bëheshin në fillim të pranverës.
Sipas epidemiologëve, moti i ngrohtë dhe i lagësht në këtë periudhë të vitit paraqet rrezik të sëmundjeve ngjitëse. Sidomos mushkonjat të cilat janë prezent në kryeqytet mund të përcjellin sëmundje serioze tek njerëzit.
Epidemiologu Vlladimir Mikiç thekson se këtë vit nuk janë regjistruar sëmundjet që shkaktohen nga mushkonjat, por theksoi se duhet të merren masa preventive që mos të ketë në Maqedoni raste të tilla.
“Sëmundjet infektive që barten përmes vektorëve, pra mushkonjat dhe insektet e tjera që ushqehen me gjak. Kafshët zakonisht janë rezervuarë të këtyre sëmundjeve, dhe njerëzit janë një strehë e rastësishme ose e fundit e këtyre sëmundjeve. Meqenëse sëmundja ‘Ethet e Nilit’, e cila u regjistrua në Maqedoni vitin e kaluar dhe malaria, e cila është një sëmundje serioze, fatmirësisht nuk është rizbuluar për një kohë të gjatë”, tha epidemiologu Mikiç nga Instituti për Shëndet Publik.
Sipas autoriteteve të qytetit, fushata kundër mushkonjave do të fillojë pas dhjetë ditëve pasi që kanë pasur dyshime në cilësinë e tenderit lidhur preparatet. Ndërkohë mjekët këshillojnë qytetarët që të mbrojnë veten nga gjakpirja e tyre.
Miradije Hasani – /tesheshi.com/
