Pak pas përbetimit politik të kreut të Kuvendit të Kosovës, Kadri Veseli se muri i serbëve në veri do rrënohet me 1 ose 17 shkurt, ka reaguar kreu i komunës së Mitrovicës, Goran Rakiç. Sipas tij, u takon autoriteve lokale të vendosin se çfarë duhet të ndërtohet ose jo në territoret përkatëse.
“Askush të mos provojë që me dhunë të rrënojë murin”, ka kërcënuar Rakiç.
Ai shtoi se në marrëveshjen e Brukselit ku palët janë pajtuar që të rivitalizohet ura kryesore mbi lumin Ibër, në njërën prej pikave të saj potencohet se punimet do t’i kryej komuna veriore e Mitrovicës.
“Kuvendi i Kosovës e ka ratifikuar Marrëveshjen e Brukselit, kështu që rezoluta dhe deklaratat për rrënimin e murit nuk ka kurrfarë baze juridike”, shtoi më tej zyrtari serb.
Siç shihet, muri do jetë sfida e radhës e autoriteteve kosovare përballë provokimeve serbe.
Dhe fakti që një prej datave për rrënimin e tij është lënë 17 shkurti, 10-vjetori i pavarësisë, e bën rastin shumë delikat.
Kosova sapo ka arritur t’i tregojë forcën Serbisë në rastin e trenit, por muri mbetet ende në një “kockë e fortë”. /tesheshi.com/
