Murat Jashari, nikoqir i familjes heroike nga Prekazi i cili sot hapi dyert e Kullës për të gjithë të interesuarit që dëshiruan të bëjnë vizitë, është deklaruar rreth mos vizitave nga krerët e shtetit.
Jashari pa përmendur askënd me emër tha se si familje nuk mbajnë inati me askënd dhe se i respektojnë institucionet kushtetuese.
“Ne nganjëherë jemi si përfaqësues të familjes Jashari dhe nganjëherë jemi qytetarë të rëndomtë. Në cilësinë e përfaqësuesit të familjes Jashari nuk guxojmë që të kemi kryeneçësi ose që të mbajmë inati dhe të tjetra ne jemi ithtarë të institucioneve kushtetuese. Pra, institucionet kushtetuese, kategoritë kushtetuese për ne janë të shenjta sepse ajo Kushtetutë është ndërtuar mbi bazën e sakrificës. Jo vetëm të sakrificës së familjes Jashari por në vazhdimësi të sakrificave dhe ne respektojmë pafundësisht institucionet kushtetuese, kurse individët ose personat të cilët udhëheqin me institucionet kushtetuese, nëse ata punojnë siç duhet do ta kenë vlerësimin tonë ose respektin tonë”, ka dekaruar Jashari.
Sot për vizitë në Odën e Jasharajve qëndruan përfaqësues të partive opozitare, krerët e FSK-së por jo edhe drejtuesit e shtetit. Këta të fundit nuk kanë treguar arsyen se pse nuk trokasin në Kullën e Jasharajve, pas homazheve që bëjnë te varrezat. /tesheshi.com/
