Udhëheqësja e protestave bjelloruse, Maria Kolesnikova u arrestua ndërsa përpiqej të hynte në Ukrainë në orët e para të mëngjesit, i tha Reuters një zyrtar i kufirit bjellorus pasi aleatët e saj thanë se ajo ishte rrëmbyer në rrugë nga njerëz të maskuar.
Rrethanat e përpjekjes së saj për të kaluar në Ukrainë nuk ishin të qarta menjëherë, ndërsa disa media fillimisht raportuan se ajo arriti të kalonte kufirin, gjë që rojet kufitare në të dy anët e kufirit e mohuan.
Lëvizja opozitare tha të hënën se burra të maskuar arrestuan Kolesnikovan në qendër të Minskut dhe e futën në një furgon që e çoi në një drejtim të panjohur, ndërsa dy aktivistë të tjerë më vonë u zhdukën.
Dy anëtarë të opozitës kaluan me sukses në Ukrainë në orët e para të mëngjesit të Martën, tha shërbimi kufitar i Ukrainës.
“Kolesnikova tani është arrestuar, nuk mund të them me saktësi se ku është tani, por ajo është arrestuar,” i tha Reuters në telefon Anton Bichkovsky, një përfaqësues i shërbimit kufitar bjellorus.
“Ajo u arrestua në lidhje me rrethanat në të cilat ata (grupi) u përpoqën të largoheshin nga territori i Bjellorusisë,” tha ai.
Kolesnikova, një anëtare e Këshillit Koordinues të opozitës, është e fundit nga tre gratë politikane që qëndrojnë në Bjellorusi dhe që bashkuan forcat përpara zgjedhjeve presidenciale të 9 gushtit në një përpjekje për të kundërshtuar Presidentin e tanishëm në detyrë, veteranin në pushtet Alexander Lukashenko.
Një kritike e zëshme e Lukashenkos, ajo ka luajtur një rol të rëndësishëm në javë demonstrimesh masive dhe grevash nga protestuesit që akuzojnë Lukashenko për manipulimin e rizgjedhjes së tij.
Lukashenko, i cili ka qenë në pushtet për më shumë se 26 vjet, mohon akuzat dhe akuzon fuqitë e huaja për përpjekjen për ta rrëzuar atë. /tesheshi.com/
