I përfolur si një Sekretar Shteti i mundshëm nën Donald Trump, Richard Grenell, pasi është sqaruar tashmë se nuk do të jetë i tillë, pritet që të emërohet si negociator aty ku me gjasë mund të shpërthejë e Treta luftë Botërore.
Sipas Reuters, Trump po shqyrton emërimin e Grenell-it si i dërguar i posaçëm për konfliktin Rusi-Ukrainë.
Më herët, Grenell ka sugjeruar krijimin e “zonave autonome” si një zgjidhje për konfliktin dhe ka shprehur qëndrime skeptike për anëtarësimin e Ukrainës në NATO në të ardhmen e afërt.
Zëdhënësja e periudhës së tranzicionit, Karoline Leavitt, nuk e ka konfirmuar emërimin e Grenell-it, duke theksuar se vendimet e tilla do të njoftohen drejtpërdrejt nga Trump.
Grenell ka një karrierë të gjatë diplomatike, duke përfshirë detyrat si ambasador i SHBA-së në Gjermani dhe i dërguar i posaçëm për dialogun mes Kosovës dhe Serbisë.
Ai gjithashtu ka shërbyer si Drejtor i Inteligjencës Kombëtare gjatë mandatit të parë të Trump-it, nga 2017 deri në 2021.
Nëse emërohet, Grenell pritet të luajë një rol kyç në përpjekjet e administratës Trump për të ndërmjetësuar dhe për t’i dhënë fund konfliktit në Ukrainë. /tesheshi.com/
