Seanca gjyqësore ndaj deputetëve të Kuvendit të Kosovës, të akuzuar për hedhje të gazit lotsjellës në këtë institucion, ka dështuar sërisht.
Shkas është bërë mungesa e Albin Kurtit dhe Donika Kadaj Bujupit, për të cilët ka pasur një urdhër për sjellje me detyrim, por kryetari i trupit gjykues ka thënë se nuk e di pse nuk ka vepruar policia.
“Gjykata ka lëshuar urdhër për sjellje me detyrim nga Policia e Kosovës. Stacionet përkatëse i kanë pranuar urdhëresat e kësaj Gjykate por deri në këtë moment nuk kemi asnjë informatë se a kanë vepruar në pajtim me këtë urdhër dhe nëse jo, pse nuk kanë vepruar”, ka thënë gjyqtari Beqir Kalludra.
Seanca tjetër është caktuar për në fund të nëntorit dhe përsëri gjykata ka lëshuar urdhër për sjellje me detyrim për Kurtin e Kadajn.
Në seancë të pranishëm kanë qenë të dëmtuarat, deputetet e PDK-së, Flora Brovina dhe Blerta Deliu Kodra dhe dëshmitari Bekim Haxhiu. /tesheshi.com/
