Tekniku italian, De Biasi, ka dalë sot në një konferencë shtypi, ku ka bërë të ditur listën e 26 lojtarëve të thirrur për takimin e 12 nëntorit me Izraelin në Shkodër.
Tre mungesat e mëdha nga emrat tradicionalë janë Kaçe, Cikalleshi e Gashi.
Për Kaçen e Gashin, tekniku e ka shpjeguar mungesën me arsyet teknike, kurse për Cikalleshin ka dhënë si argument mungesën e plotë të aktivizimit.
Lënia e Kaçes jashtë listës ishte e pritshme, pas zhurmës së bërë në mbarim të takimit me Spanjën, teksa mesfushori u la në tribunë. Cikalleshi, po ashtu, nuk luan prej kohësh, e madje nuk ka qenë as rezervë në disa takime të Istanbul Bashakshehirit në kampionatin turk, kështu që dhe mungesa e tij ngjan e logjikshme. Mosthirrja e Gashit ka disa pikëpyetje pas formës së shkëlqyer që po kalon ai, por sulmuesi gjithsesi nuk do mund të luante nga dëmtimi që pësoi mbrëmë.
Të thirrurit për përballjen me Izraelin janë këto emra: Berisha, Hoxha, Strakosha, Shehi, Aliji, Gjimshiti, Mavraj, Hysaj, Agolli, Veseli, Ajeti, Memushaj, Lila, Basha, Grezda, Roshi, Kukeli, Lenjani, Hyka, Xhaka, Abrashi, Balaj, Cani, Sadiku, Llullaku e Manaj.
Sa për Izraelin, De Biazi e ka cilësuar atë një kundërshtar të vështirë, të fortë e me cilësi.
“Do të tentojmë fitoren,” kanë qenë fjalët e italianit për kundërshtarin e drejtpërdrejtë të Shqipërisë. /tesheshi.com/
