Nga Blendi Gashi
Mungesa e luftës kundër korrupsionit vazhdon të jetë një nga brengat kryesore në vend. Kjo dukuri negative që është bashkëshoqëruese e Kosovës për 15 vite me radhë, së fundmi ishte edhe pengesë që mos t’i liberalizohen vizat.
Kuvendi i Kosovës që është në një mjegull të madhe për më tepër se tre muaj, ende vuan nga mungesa e ligjit të shumëpërfolur, ligjit antimafia.
Ka qenë edhe Komisioni Evropian që në vazhdimësi në raportet e tij ka përmendur mungesën e këtij ligji, i cili do të kontribuonte në konfiskimin e pasurisë së paligjshme.
Gjashtëdhjetë zyrtarë të lartë nuk e kanë deklaruar pasurinë për vitin 2015, për sa kohë që pasuria e zyrtarëve të tjerë që është deklaruar në Agjencinë Kundër Korrupsionit vazhdon të rritet në mënyrë të pa kontrolluar.
Aktualisht, sekuestrimi dhe konfiskimi i pasurisë është i rregulluar me Kodin e Procedurës Penale si dhe Ligjin për Kompetencat e Zgjeruara për Konfiskimin e Pasurisë së Përfituar me Vepër Penale.
Por, shtrohet pyetja pse edhe pas 15-vitesh politika kosovare nuk ka miratuar këtë ligj përmes së cilit do të sekuestrohej pasuria e zyrtarëve të shtetit e fituar në mënyrë ilegale?
Ministri i Drejtësisë, Hajredin Kuçi, kishte thënë për media ndonëse nuk ekziston ligji antimafia, është “Ligji për Zgjerimin e Kompetencave për Konfiskimin e Pasurisë së Fituar me Vepër Penale” që kryen funksionin e njëjtë, por me emërtim ndryshe.
Profesori Riza Smaka, thotë se ligji në fjalë është problematik përkitazi me implementimin e tij, ngase për t’u konfiskuar një pasuri e fituar me kriminalitet paraprakisht kërkohet që në procedurë penale të vërtetohet fakti i realizimit të asetit të caktuar në mënyrë e bazë kriminale.
Smaka në një prononcim për tesheshi.com thotë se në rrethanat aktuale në vendin tone për të filluar e përfunduar një çështje juridike penale kërkohe vite të tëra për t’u ekzekutuar rasti i caktuar edhe po aq vite nëse në ndërkohë nuk zhduket apo nuk parashkruhet lënda.
“Ndaj Ligji antimafia duhet të suportohet fuqishëm nga shoqëria civile, opozita dhe cilido entitet që vendit tonë ia dëshiron të mirën e të mbarën. Nuk mund të imagjinohet racionalisht që të justifikohet zëvendësimi i këtyre dy akteve ligjore aq me parë kur Ligji për Sekuestrimin e pasurise së Fituar me Vepër Penale është i mangët, i paqartë (qëllimisht) dhe virtuelisht i parealizueshëm së pakut jo në një nivel ordiner”, ka deklaruar profesori Smaka.
Deputeti i NISMA-s, Zafir Berisha në një prononcim për tesheshi.com thotë se mungesa e vullnetit për të miratuar ligjin antimafia, lidhet pikërisht me atë se shumë zyrtar politik e institucional janë vetë pjesë e krimit të organizuar dhe shkeljeve ligjore që ndodhin në Kosovë.
“Natyrisht që ne jemi të interesuar të ketë një ligj që i precizon qartë gjërat deri ne atë shkallë që të gjithë ata që jenë pasuruar në mënyrë të paligjeshme t’iu konfiskohet pasuria dhe të përgjigjen para drejtësisë”, thotë deputeti Berisha.
Ndryshe, koordinatori nacional për luftim të krimit ekonomik në kuadër të Prokurorisë së Shtetit, Shqipdon Fazliu, ka pranuar kohë më parë se mungesa e ligjit antimafia është duke sjellë probleme të mëdha në rrugën e sekuestrimit dhe konfiskimit të pasurisë së fituar në mënyrë ta paligjshme.
“Problemi më i madh në sekuestrimin dhe konfiskimin e pasurisë është mungesa e një ligji antimafia, i cili do të mundësonte konfiskimin e asaj pasurie pa filluar një aktgjykim ndaj të pandehurit, që dyshohet për krijim të pasurisë në mënyrë të paligjshme dhe ky është një problem elementar që ka të bëjë me konfiskimin e pasurisë”, kishte deklaruar Fazliu.
/tesheshi.com/
