Moshe Ya’alon, ministri i Mbrojtjes në qeverinë izraelite, ka lajmëruar këtë mëngjes dorëheqjen, duke i mëshuar mungesës së besimit te eprori i tij.
“E informova kryeministrin se pas sjelljes të tij dhe zhvillimeve të fundit, e duke patur parasysh mungesën e besimit në të, po jap dorëheqjen nga qeveria dhe parlamenti…,” ka shkruar Ya’alon në rrjetin social Twitter.
Dorëheqja ka ardhur pasi ditët e fundit Netanyahu propozoi zëvendësimin e ministrit aktual me një tjetër figurë politike, me ish-ministrin e Jashtëm, Avigdor Lieberman.
Netanyahu po përpiqet ta zgjerojë koalicionin qeverisës, duke qenë në negociatat finale me partinë e Lieberman-it, Yisrael Beytenu.
Përpara dorëheqjes së Ya’alon-it, qe besuar se Netanyahu do t’i ofronte atij në shkëmbim postin e ministrit të Jashtëm.
Caktimi i Lieberman-it në postin e ministrit të Mbrojtjes është përcjellë me një kritikë të gjerë, ndërsa ai njihet si një ndër politikanët izraelitë më populistë dhe më të polarizuar. Veç të tjerash, ai ka kërcënuar t’i vrasë udhëheqësit e Hamas-it, duke i quajtur njëkohësisht “tradhtarë” deputetët arabë në Knesset, në parlamentin izraelit. /tesheshi.com/
