Nga Blendi Gashi
Zgjedhjet e 11 qershorit i dhanë rritjen më të madhe Lëvizjes Vetëvendosje ku doli partia e parë në vend dhe njëherësh përveç Prishtinës arriti triumfin edhe në tetë komuna të tjera.
VV-ja doli fituese në Prishtinë, Gjilan, Ferizaj, Kamenicë, Fushë Kosovë, Kaçanik, Vushtrri, Han të Elezit dhe Viti, ku shumica prej tyre konsideroheshin bastione të dy partive tradicionale, PDK-së e LDK-së.
VV kështu arriti të thyejë tabun në komunën e Fushë Kosovës, e cila tradicionalisht i takonte LDK-së.
Dhe duke parë këtë rezultat tejet të mirë të arritur në parlamentaret, lidershipi i Vetëvendosje-s është tejet i bindur se të njëjtin do të korrë edhe në zgjedhjet lokale të 22 tetorit ku do të marrë pushtetin në të paktën dhjetë komuna.
“Përmes Vetëvendosjes dhe Shpend Ahmetit është dëshmuar se kur ke program politik ndryshimet janë të mundshme. Komuna e Prishtinës ndërpreu ndërtimet pa leje, përmirësoi procesin e menaxhimit të arsimit, shëndetësinë, e largoi luksin. Dhe pas 22 tetorit komuna të tilla do të kemi shumë. Kosova do të ketë shumë Prishtina, komuna të qytetarëve dhe jo të pushtetarëve”, tha kryetari i VV-së Visar Ymeri në një konferencë për media të mbajtur këtë javë.
I bindur se do të triumfojnë të paktën në dhjetë komuna është edhe ish-sekretari i VV-së, tashmë deputeti Dardan Molliqaj.
Ai një ditë para hapjes së fushatës ka deklaruar se VV është e përgatitur e gatshme për fitore si asnjëherë më parë.
“Rezultati i 22 tetorit do të jetë tronditja e radhës për subjektet politike që kanë keqqeverisur në komunat e Kosovës për vite me radhë. Lëvizja jonë me kandidatët e saj, do ta merr udhëheqjen në më shumë se 10 komuna, shumica prej tyre komunat më të mëdha të Kosovës.
Një gjë është e sigurtë: pas këtyre zgjedhjeve, ne do të qeverisim për më shumë se gjysmën e popullsisë së Kosovës”, ka deklaruar Molliqaj.
Po ç’gjasa ka të mbajë komunat që i fitojë më 11 qershor…
Pavarësisht deklarimeve tejet bindëse të krerëve të VV-së duhet thënë se zgjedhjet parlamentare dallojnë nga ato lokale pasi qytetarët shikojnë më shumë tek kandidatët që përzgjedhin partitë për kryetar.
Dhe nëse shikohen kandidatët duhet thënë se disa prej të nominuarve të VV-së për kryetar në disa nga komunat që triumfoi më 11 qershor janë më pak të njohur se kandidatët e partive tradicionale PDK e LDK.
Po ashtu balotazhi mund të jetë një pengesë e madhe që VV të marrë pushtetin në këto komuna për shkak se PDK e LDK edhe pse rivale në qendër, mund të bashkohen në komuna për të mos lënë VV të triumfojë dhe të rritet edhe më shumë.
Vlen të theksohet këtu se tashmë në media ka nisur të flitet se ka një marrëveshje në heshtje mes LDK-së e PDK-së në Prishtinë që nëse shkojnë në balotazh me VV-në të lidhin koalicion dhe të mposhtin Shpend Ahmetin, dhe një gjë e tillë lehtë mund të ndodh edhe në komunat ku këto dy parti mund t’iu rrezikohet pushteti.
Kumunat që mund t’i mbajë…
VV përkundër një bashkimi LDK-PDK në Prishtinë ka gjasa ta mbajë kryeqytetin pasi ka dëshmuar rritje të ndjeshme edhe në parlamentaret por edhe vlerësohet, jo pak, puna e Ahmetit nga qytetarët.
Fushë Kosova është një tjetër komunë ku Vetëvendosje pritet të befasojë për të mirë dhe t’ia marrë pushtetin LDK-së e cila e qeverisë nga paslufta.
VV në këtë komunë ka pasur një rritje të ndjeshme dhe me kandidatin Avni Zogiani pritet të shkojë në balotazh me Burim Berishën e LDK-së, dhe varet më pas nëse elektorati i partive tjera do i japë votën VV-së për ta dërguar në opozitë për herë të parë LDK-në në këtë komunë. koalicionet që do bëjë.
Gjasa të mira të arrijë në balotazh ka edhe në Ferizaj ku VV garon me deputetin Faton Topalli, një figure kjo e njohur. Sfidues pritet të ketë në balotazh Agim Aliun e PDK-së e jo Muharrem Sfarqën e LDK-së, kreun aktual pasi ka jo pak kritika për punën tij.
Gjasa më të mira ka në Viti pasi garon me një kandidat të njohur siç është Salih Salihu ish-deputet. Në këtë komunë pritet që tëshkojë në balotazh me LDK-në dhe i duhet më pas përkrahja edhe e elektoratit të partive tjera për të bërë befasinë.
Komunat që vështirë se mund ta ruajë kryesimin…
Edhe pse doli e para në Gjilan e ka tejet të vështirë të fitojë këtë komunë pasi që LDK e PDK garojnë me dy emra tejet të njohur. LDK me kreun aktual Lutfi Haziri dhe PDK me Zenun Pajzitin dhe pritet që këto parti të shkojnë në balotazh.
Gjasa të pakta për të triumfuar VV ka edhe në Vushtrri ku PDK e LDK pritet të marrin pushtetin.
Edhe në Kaçanik e Kamenicë edhe pse doli e para më 11 qershor vështirë se mund ta marrë pushtetin pasi gjasat më të mëdha i kanë PDK e LDK.
VV e para doli edhe në komunën e vogël të Hanit të Elezit por nuk ka gjasa të mëdha që t’ia marrë pushtetin të pavarurit Refki Suma i cili qe tre mandate ka mposhtur të gjitha partitë në këtë komunë. /tesheshi.com/
