Nga Blendi Gashi
Kosova brenda tre vitesh sërish ka hyrë në qorrsokak politik ku inatet mes partive po pamundësojnë krijimin e institucioneve të reja të dala nga zgjedhjet e 11 qershorit.
Fatkeqësisht për të tejkaluar këtë ngërç politik si opsion i vetëm po shihet sërish mbajtja e zgjedhjeve të jashtëzakonshme parlamentare, çka hapur e kanë thënë tashmë deputetë nga dy kahet, si nga “koalicioni i luftës” me në krye me Veselin e Haradinajn, ashtu edhe nga ai i “paqes” i udhëhequr nga Avdullah Hoti i LDK-së.
Dhe nëse brenda këtij muaji koalicioni PAN nuk rikthehet për të marrë pjesë në seancën konstituive për të zgjedhur kryetarin e nënkryetarët e Parlamentit, sipas të gjitha gjasave më 22 tetor përveç zgjedhjeve lokale do të organizohen edhe ato parlamentare.
Kjo është mëse reale po të kihet parasysh fakti se kreu i PDK-së Kadri Veseli është tejet i pakënaqur me rezultatin e marrë qoftë si parti ose në koalicion me AAK-në e NISMA-n dhe do synojë, qoftë vetëm si parti, apo sërish së bashku të korrin rezultat më të favorshën, pasi vështirë se mund ta përballojë faktin se Vetëvendosje është parti e parë dhe po ia rrezikon seriozisht privilegjet e pushtetit.
Pyetja që kërkon përgjigje në këtë lëmsh aktual politik është se kujt i duhen më tepër zgjedhjet e reja dhe a do të krijonin zgjidhje?
Ja ç’mendojnë analistët…
Analistët politikë nuk presin që zgjedhjet të orfojnë zgjidhje rrënjësore kur mentaliteti politik mbetet i njëjtë. Kurse sa i përket rezultatit thonë se kjo varet nga mënyra e konkurimit të partive.
Leon Duhanaj, analist politik thotë se mbajtja e zgjedhje të parakohshme nuk nënkupton se ato mund të sjellin zgjidhje, por që nuk përjashtohet mundësia të sjelinl rifreskim të skenës politike.
Ai mendon se para se vendi të shkojë në zgjedhje të tilla duhet të formulohet një kod etik dhe moral, të nënshkruhet nga të gjitha subjektet në mënyrë qe secila palë, pas zgjedhjeve t’i respektojë zhvillimet normale të demokracisë, pa akuzuar, pa përjashtuar askënd.
Sa i përket ndryshimit të rezultatit nga zgjedhjet e 11 qershorit, Duhanaj thotë se kjo varet krejt se si do të garonin partitë politike, veçmas apo në koalicione.
“Ka mundësi që të kemi lëvizje në përqindje, por problemi mbetet prap i njëjti. Pa vullnet politik nuk ka zgjidhje. Se kush sa mund të ketë rritje apo rënie, varet nga mënyra e konkurimit”, thotë Duhanaj për tesheshi.com.
Sipas tij problemi pra nuk qëndron tek zgjedhjet, por tek mentaliteti politik.
“Në asnjë vend normal, nuk ndodhë që parti të ndryshme politike të vendosen në barrikada gjithmonë, me pretekstin e vijave të kuqe. Pse ka vija te kuqe? Si është e mundur që të gjitha partitë shqiptare, bazuar në kodin zgjedhor dhe Kushtetutën, janë të detyruara të bashkëqeverisin me Listën Serbska dhe, këtë e bëjnë pa asnjë përtesë, përderisa shpallin vija të kuqe kundra njëra-tjetrës pa asnjë arsye. Kjo metodë a mbrapshtë, nuk ka qenë e njohur tek ne. Ka qenë e njohur ne Shqipëri si pasojë e një kaste politike kriminale e cila e mbajti peng Shqipërinë me dekada kinse në tranzicion. Këtë mentalitet, tek ne e instalojë Vetëvendosje e cila nuk e ka për synim politik bashkëpunimin dhe bashkëqeverisjen, por kthimin mbrapa të shtetit të Kosovës, deri në shpalljen e dështuar të tij”, thotë Duhanaj.
Njohësi i rrethanave politike, Arsim Haziri mendon se një proces i parakohshëm zgjedhor e sidomos i dyfishtë, pra mbajtja e zgjedhjeve lokaleve dhe parlamentareve brenda një kohe pёrbёn gabim tё madh.
“Zgjedhjet e reja nёse eventualisht shihen tё domosdoshme, nuk mund t’i kontribuojnё krijimit tё institucioneve fondamentale, kjo ёshtё logjikё e subjekteve nё fuqi nё kohёn ku nuk po arrinjё tё kenё legjitimitetin e plotё qytetarё pёr t’i konkretizuar institucionet.
Zgjedhjet e reja, nuk mendoj se mund të ndryshojnë edhe aq shumё skenёn politike, kёtё pritet ta dёshmojnё qytetarёt siç e dёshmuan nё procesin e 11 qershorit”, thotë Haziri për tesheshi.com.
Sipas tij, kriza e thellё politike nuk mund tё pёrfundojë me mbajtjen edhe të njё palё zgjedhjeve, ndaj thotë se është e udhës që subjektet politike të dalin prej interesave e pretendimeve tё sёmura, dhe se pushtetin duhet ta formojnё ato parti tё cilat garantojnё shumicёn e nevojshme rreth formimit tё organeve vitale të shtetit.
Kujtojmë se e përditshmja gjermane “Tageszeitung”, në një artikull të botuar në numrin e sotëm ku ka trajtuar krizën politike në Kosovë, ka shkruar se Vetëvendosje është partia që do të përfitonte më shumë nga përsëritja e zgjedhjeve eventuale. /tesheshi.com/
