Prej kur Shpend Ahmeti u largua nga Vetëvendosje, pothuajse të gjitha partitë i kanë hapur dyert atij, përjashtuar PDK-në.
Por ftesën më të hapur atij, deri tani ia ka bërë vetëm AAK-ja e Ramush Haradinajt. Është i vëllai i këtij të fundit, deputeti Daut Haradinaj, i cili ka deklaruar se kjo parti është e hapur për ish-vetëvendosësin, kreun aktual të Prishtinës.
“Ne kemi fitu në Klinë, Gjakovë, Rahovec, Deçan e Junik. Kemi një pushtet lokal pothuajse gati partia e parë. Jemi në bashkëqeverisje në shumë komuna po ashtu edhe në kryeqytetin e Kosovës. Sa i përket veprimeve të tij të brendshme nuk i kisha komentu. Por Aleanca asnjëherë nuk ka qenë e mbyllur e sidomos për Shpend Ahmetin. Jo vetëm ftesë por po flas por në krejt atë natyrën personale e vlerësoj shumë edhe si njeri dhe shpresoj të ketë shumë sukses në qeverisjen e komunës së Prishtinës. Pse jo edhe nëse Shpend Ahmeti e vlerëson si ftesë le ta konsideron si ftesë”, ka thënë Haradinaj në një intervistë për Periskopi-n.
Por a mundet vërtet që Ahmeti, një harward-ist të kalojë te një forcë e dalë nga gryka e pushkës? Kohë më pare, mediat kosovare aluduan se Ahmeti mund t’i bashkohet AAK-së, por që vetëvendosësi i demantoi ato shkrime duke thënë se nuk do të ndodhë një gjë e tillë.
Ndërsa tani gjërat kanë ndryshuar dhe Ahmeti ka para vetës tre zgjidhje: të themelojë parti të re me krahun anti-Kurti; të bashkohet me ndonjë parti tjetër ose të tërhiqet përfundimisht nga politika. Koha do të tregojë se cilin opsion do ta zgjedhë. /tesheshi.com/
