Nga Blendi Gashi
Drenasi, komunë kjo që nga paslufta bastion i pathyeshëm dhe i pakontestueshëm i Partisë Demokratike të Kosovës, këtë 4 dhjetor ka marrë vëmendjen e të gjitha mediave në Kosovë. Arsye për këtë është se organizohen zgjedhjet e jashtëzakonshme për kryetar komune, kjo pas detyrës që la tashmë ish-kryetari Nexhat Demaku që u dënua nga drejtësia.
Menjëherë pas largimit të Demakut që udhëhoqi për dy mandate këtë komunë, vëmendje e madhe si kurrë më parë u drejtua drejt Drenasit.
Dhe meritat më të mëdha pse ndodhi kjo përveç se do të mbaheshin zgjedhje të parakohshme, padyshim se ka Xhavit Drenori, kandidat që në këto zgjedhje kandidon si i pavarur.
Drenori, edhe pse një asambleist i PDK-së, doli në pah duke kritikuar tej mase partinë e tij dhe kryetarin Demaku për keqqeverisje, gjë që nuk ndodhte kurrë më parë në këtë komunë, dhe në vitet paraprake as që ka guxuar të dale ndonjë zë i fuqishëm që e kritikon PDK-në në këtë komunë.
Dhe, “zëngrituri” Drenori bëri që mediat por jo vetëm të drejtojnë sytë kah Drenasi. Arsyeja e thjeshtë. Për herë të parë një njeri nga PDK po e kritikonte partinë dhe njëherit po i thoshte se subjektit të tij se nëse dëshiron të ndodh ndryshimi dhe të pranoj edhe zërat kundër nga brenda, atëhrë ta kandidoj pikërisht atë.
Por, ashtu edhe siç pritej kërkesa e Drenorit drejtuar partisë së tij hasi në vesh të shurdhër, pasi PDK nuk e kandidoi atë për kryetar komune, por zgjodhi Ramiz Lladrovcin. Dhe kështu Drenori, ashtu si paralajmëroi i hyri garës si i pavarur.
Dhe kjo i nxori telashe jo të pakta PDK-së, sigurisht për fajin e saj.
Partia e parë në vend, e vetëdijshme se gjërat në Drenas po ndryshojnë dhe më nuk e ka një bastion të sigurt, pra përkrahjen e madhe të qytetarëve si 17 vjet më parë, krerët e PDK-së si asnjëherë më parë, së bashku me deputetë i qëndruan pranë gjatë gjithë fushatës kandidatit të tyre Ramiz Lladrovci.
Pikërisht prania e tyre (krerëve të PDK) në shumë fshatra të Drenasit tregoi qartë se kjo parti nuk e ka përkrahjen e padiskutueshme si paslfute, dhe këtë e kuptuan nga kritikat e marra nga banorët e dy fshatrave Baincës dhe Abrisë të cilët nuk hezituan t’I quanin drejtuesit e PDK-së edhe si hajna.
Por, fenomenti “Drenori” dhe “sharja e krerëve të PDK-së nga drenicakët”, nuk janë vetëm dy risitë që sollën zgjedhjet e jashtëzakonshme në Drenas.
Një befasi tjetër padyshim se është edhe rritja sado e vogël apo e madhe e LDK-së në këtë komunë që vite më parë kjo parti ekzistonte në Drenas vetëm sa për të thënë.
Mbushja e odave të fshatrave të Drenasit me përkrahës të LDK-së dhe sidomos pjesëmarrja e drejtuesve të lartë të kësaj partie në këto organizime (ministrit të Financave Avdullah Hoti në një prej odave në fshatin Abri, ku u këndua me çifteli kënga e Destan Begut), është një ndryshim i madh dhe i paimagjinueshëm vite më parë, kur dihet se shumë zyrtarë të LDK-së nuk kanë guxuar të shkojnë të bëjnë fushatë as ditën në fshatrat e Drenicës, dhe as që e kanë marrë mundin të shkojnë pasi e kanë ditur se Drenasi e Skenderaj janë bastione të fuqishme të PDK-së.
Andaj, duke parë pakënaqësinë e drenicakëve ndaj partisë së tyre të “zemrës”, rritjen e LDK-së. Votat që PDK-së mund t’ia marrë Xhavit Drenori si dhe Isa Xhemajlaaj i paritsë NISMA për Kosovën, shtrohet pyetja se a mund të ngjajë në Drenas ajo që ngjau tre vite më parë në Prishtinë, ku LDK e humbi pushtetin pas 14 vitesh?
Kandidati i LDK-së, Bedri Nika, ai i NISMA-s, Isa Xhemajlaj dhe i pavaruri Drenori janë shprehur të bindur në fitore duke thënë se do ta “thyejnë PDK-në”, pas 17 vitesh në Drenas.
Pavarësisht se kush do të fitoi, edhe nëse fiton prap PDK, një gjë është mëse e qartë se një ndryshim ka ndodh në Drenas, dhe partia e Kadri Veselit në zgjedhjet lokale që mbahen pas një viti sipas kalendarit zgjedhor për kryetar komunash, duhet të “dhezë” sërish motorët dhe të niset për Drenas për të kërkuar votën e qytetarëve pasi, këto ditë e ka kuptuar mirë që nëse lë në harresë kërkesat e banorëve të kësaj komune mund të ndëshkohet lehtë, pra të humb një pjesë të madhe të Drenicës. /tesheshi.com/
