Të tjera detaje zbardhen mbi masakrën e Las Vegasit, ku mbetën të vrarë 59 persona dhe u plagosën 527 të tjerë. Autori i ngjarjes, Stephen Paddock, 64 vjeç, sipas mediave amerikane ishte një multimilioner, që kishte mbledhur një arsenal armësh, edhe pse vëllai i tij, thotë se nuk i kishte qejf ato.
Policia gjeti në dhomën e tij në hotelin “Mandalay Bay” 23 lloje armësh, mes të cilave edhe një snajper, me të cilin ka qëlluar mbi turmën e mbledhur në koncertin muzikor.
Stephen Paddock, 64 vjeç, kishte bërë miliona nga marrëveshjet e pasurive të paluajtshme, sipas vëllait të tij. Ai, gjithashtu, zotëronte dy aeroplanë dhe disa prona në të gjithë SHBA-në.
Por ai, gjithashtu, do të grumbullonte fshehurazi një arsenal masiv prej 42 armësh zjarri. Të paktën një prej tyre ishte automatik, ndërsa dy të tjerë ishin modifikuar me pajisje, që lejon armët gjysmë automatike të hapin zjarr të plotë, duke nxjerrë 400-800 fishekë në minutë.
Disa kishin objektivë dhe të mbushura me municion ushtarak.
Ai mori 23 prej këtyre armëve në suitën e tij Mandalay Bay përgjatë disa ditëve dhe kishte vendosur dy pushkë në një stol mbi dritare, me pamje nga rruga 91 Harvest, ku po mbahej festivali i muzikës.
Mijëra fishekë u gjetën gjithashtu në suitë, të cilët do t’i mundësonin të qëllonte pa pushim gjatë 72 minutave. Në makinën e tij, u gjetën disa materiale për krijimin e një bombe.
Paddock kishte jetuar në 27 rezidenca në Nevada, Florida dhe Teksas. Mediet raportojnë se bënte një jetë të qetë dhe arsyeja e sulmit mbetet mister.
Gjatë bastisjes së një prej banesave të tij të hënën, shtëpisë në Mesquite, të cilin ai e bleu për vetëm 369 mijë dollarë në vitin 2015 sipas të dhënave publike, policia gjeti një arsenal të dytë armësh edhe më i madh se ai në dhomën e Mandalay Bay.
Policia shtoi se gjeti edhe pajisje elektronike që ende po shqyrtohen për të përcaktuar qëllimin e tyre.
Vëllai i tij e përshkruan Paddock si njeri të qetë, të shoqërueshëm, që nuk i kishte me qejf armët dhe që nuk kishte shfaqur shenja çrregullimi mendor, apo depresioni në të shkuarën.
Kontabilisti në pension kishte punuar si auditor i brendshëm në Lockheed Martin për tre vjet, në fund të viteve 1980, dhe ishte një menaxher dhe investitor në komplekset e apartamenteve që ndodheshin në Mesquite, Teksas dhe Kaliforni, përmes të cilave bëri milionat, tregon më tej vëllai i tij.
Paddock kishte licença të gjuetisë dhe të peshkimit sipas të dhënave publike, si dhe licençën e pilotit, por nuk kishte të dhëna kriminale në shtetin e Nevadës.
Vetëm pasioni për lojërat e fatit mund të shihet si diçka e pazakontë tek ai.
“Stephen luajti 100 dollarë në videopoker dhe ‘më dërgoi një fotografi që fitoi 40 mijë dollarë në një automat”, thotë i vëllai.
Ndërkohë, autoritetet amerikane konfirmuan se Stephen kishte lëvizur shuma të konsiderueshme parash në llogaritë që kishte në disa sallone lojërash fati në Las Vegas dhe thonë se po punohet për të gjetur nëse bëhej fjalë për para të fituara nga bixhozi, apo borxhe për të shlyer.
“Ai nuk kishte asnjë lidhje fetare apo politike”, thotë i vëllai. /tesheshi.com/
